काठमाडौं । नेपाली कांग्रेसका वरिष्ठ नेता रामचन्द्र पौडेलले कार्यकर्तालाई कसैको गुटमा नलाग्न आह्वान गरेका छन् । नेता पौडेलले १४ औं महाधिवेशनमा देउवा वा पौडेल भन्दै कसैको पक्षमा नटासिन कार्यकर्ताहरुलाई आग्रह गरेका हुन् ।
शनिबार काठमाडौंमा आयोजित कार्यक्रममा पौडेलले व्यक्तिका पछाडिभन्दा पनि लोकतान्त्रिक गणतन्त्र र सिंगो पार्टीका पछि लाग्न आग्रह गर्दै व्यक्ति हेरेर पार्टी सभापति शेरबहादुर देउवा वा आफ्नो पक्षमा नलाग्न कार्यकर्तालाई आग्रह गरेका हुन्।
उनले १४ औं महाधिवेशनमा लोकतान्त्रिक अभ्यास गर्न पनि आग्रह गरे। ‘जनतामा कांग्रेसप्रति नराम्रो सन्देश गएको छ। यो बिडम्बना हो,’ उनले भने, ‘कांग्रेसले संविधान ल्याउने। लोकतान्त्रिक गणतन्त्र ल्याउने पार्टीले नै चुनाव हारेर राम्रो गरेन। गणतन्त्र र संविधान कार्यान्वयनका बेला कम्युनिष्टको हातमा गयो यो बिडम्बना हो।’
