काठमाडौं। वि.सं. २०८२ सालको पहिलो सुपरहिट नेपाली फिल्म बन्न सफल ‘ऊनको स्वीटर’ चौथो हप्तासम्म पनि बक्स अफिसमा धमाका मच्चाइरहेको छ।
प्रदर्शनको तेस्रो हप्तामै १० करोडभन्दा बढी ग्रस कमाइ गरेको यस फिल्मले न केवल व्यवसायिक सफलता हात पारेको छ, बरु दर्शकको मनमा पनि गहिरो छाप छोड्न सफल भएको छ।
यसै सफलता र दर्शकप्रतिको कृतज्ञता प्रकट गर्न फिल्म युनिटले मङ्गलवार साँझ चाबहिलस्थित एफक्युब सिनेमा हलमा फिल्म हेरेका दर्शकहरूसँग केक काटेर खुसी साटेको छ। निर्देशक नवीन चौहानका अनुसार यो कार्यक्रम कुनै प्रचार नभई दर्शकप्रतिको धन्यवाद स्वरूप गरिएको हो। उनले भने, “दर्शकसँग माया साट्न केक काटिएको हो।”
कार्यक्रममा प्रमुख कलाकार विपिन कार्की, एलेक्स पारस, परीक्षा लिम्बु, शारदा देवी सिलवाल, भावना खपाङ्गी मगर, संगीत निर्देशक कोविद बज्र, गीतकार हर्क साउद, गायक सुजन चापागाईं, छायाँकार चिन्तन राजभण्डारी र निर्देशक चौहान स्वयं उपस्थित थिए। केकमा फिल्मका पोस्टर र चर्चित गीतहरूको झल्को दिने चित्रहरू सजाइएको थियो।
‘ऊनको स्वीटर’ हाल नेपालभर १०० भन्दा बढी शोहरूमा चलिरहेको छ भने अमेरिका, अस्ट्रेलिया, जापान, दक्षिण कोरिया, युरोप, र मध्यपूर्वका देशहरूमा समेत प्रदर्शन भइरहेको छ। फिल्ममा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर र सुनिल पोखरेललगायतका कलाकारको अभिनय रहेको छ।
फिल्मले अन्तर्राष्ट्रिय स्तरमा पनि चर्चा बटुलिरहेको छ। फ्रेन्च निर्देशक एरिक भ्यालीले यसलाई “नेपाली समाज र संस्कृतिको संवेदनशील प्रस्तुति” भनेका छन्। त्यस्तै मनीषा कोइरालादेखि बाबुराम भट्टराई, राजेश पायल राई, विजय लामा र नाजिर हुसेनसम्मले फिल्मको खुलेर प्रशंसा गरेका छन्।
‘ऊनको स्वीटर’ले नेपाली सिनेमाको गुणस्तर, प्रस्तुतिकरण र दर्शकको लगावलाई पुनः एकपटक स्थापित गरिदिएको विश्लेषण गरिएको छ। दर्शकको अपार मायाले यो फिल्म लामो समयसम्म हलमा टिक्ने सम्भावना देखिएको छ।
