काठमाडौँ । एसिसी यू–१६ इस्ट जोन कप क्रिकेट प्रतियोगिताको उपाधि नेपालले जितेको छ ।
भर्खरै सम्पन्न खेलमा सिङ्गापुरलाई दुई विकेटले हराउँदै नेपाल च्याम्पियन बनेको हो । सिङ्गापुरले दिएको ११४ रनको लक्ष्य नेपालले २९ ओभरमा ८ विकेट गुमाउँदै पूरा गर्यो ।
नेपालका लागि जोय थापाले २४, शिवान्स बजगाइँले २०, शुभम खनालले १८ तथा प्रशिद्ध जैशीले १७ रन जोडे ।
बलिङतर्फ सिंगापुरका कपिश भेंकत्रमानले चार, युभान पाण्डेले दुई तथा वेदान्स गुप्ता र आकाश तेजाले एक–एक विकेट लिए ।
त्यसअघि मलेसियाको युकेएम ओभलमा टस जितेर पहिले ब्याटिङ गरेको सिंगापुरले ४० दशमलव पाँच ओभरमा सबै विकेट गुमाउदै ११३ रनको योगफल बनायो ।
उसका लागि रोहन अस्टिनले सर्वाधिक २३ रन बनाए । त्यसैगरी रिहान नाइकले १५, दान्स गुप्ता १२ रन र आकाश तेजाले १० रन बनाए । त्यसबाहेक सिंगापुरका अन्य ब्याटरले दोहोरो अङ्कमा रन जोड्न सकेनन् ।
सिंगापुरलाई सस्तैमा समेट्ने क्रममा नेपालका लागि अभय यादव र सुशीलबहादुर रावलले समान तीन÷तीन विकेट लिए भने शुभम खनालले दुई विकेट लिए । त्यस्तै कप्तान बिपिनप्रसाद शर्माले एक विकेट लिए ।
नेपालले प्रतियोगितामा अपराजित रहँदै उपाधि जितेको हो ।
