काठमाडौं । उज्वेकिस्तान एएफसी महिला एसियन कपमा छनोट भएको छ ।
नेपाललाई पेनाल्टी सुटआउटमा ४-२ ले हराउँदै उज्वेकिस्तान समूह विजेता बनेर २०२६ मा अस्ट्रेलियामा हुने एसियन कपमा स्थान बनाएको हो ।
पहिलो हाफमा ३-१ गोलले पछि परेको नेपाल दोस्रो हाफमा खेलमा फर्किएको थियो । खेलको दोस्रो मिनेटमा नै उज्वेकिस्तानले अग्रता लियो ।
डियोराखोन खाबिबुल्लाएभाले गोल गर्दै घरेलु टोलिलाई अग्रता दिलाएकी हुन् ।
१२ औं मिनेटमा उज्वेकिस्तानले अग्रता दोब्बर पार्यो ।
कप्तान लुद्मिला काराचिकले प्रहार गरेको बल नेपालका खेलाडी समिक्षा घिमिरेलाई लागेर गोलमा परिणत भयो ।
२४ औं मिनेटमा नेपालका कप्तान साबित्रा भण्डारीले गोल गर्दै नेपाललाई १-२ को अवस्थामा ल्याइन् । उनले डि-बक्स बाहिरबाट उत्कृष्ट गोल गरिन् ।
३९ औं मिनेटमा उज्वेकिस्तानले ३-१ को अग्रता बनायो । माफ्तुना शोयिमोभाले पेनाल्टीमा गोल गरेकी हुन् ।
यता दोस्रो हाफमा ७१ औं र ७३ औं मिनेटमा गोल गर्दै साम्बाले ह्याट्रिक पूरा गरिन् ।
निर्धारित ९० मिनेटको समय र ७ मिनेटको इन्जुरी समयसम्म पनि बराबरी भएपछि खेल पेनाल्टी सुटआउटमा गयो । जसमा नेपाल २-४ ले पराजित हुन पुग्यो ।
कप्तान भण्डारी पेनाल्टीमा भने चुकिन् । उनले दायाँ पोलमा प्रहार गरिन् ।
