काठमाडौँ । सांसदहरुले निर्माणाधिन संसद भवनको काम म्याद थप भएको मितिमा समेत सम्पन्न हुन नसक्ने आशंका व्यक्त गरेका छन् ।
सोमवार निर्माणाधिन नयाँ संसद भवनको निरीक्षणका लागि पुगेको संसदीय समितिका सदस्यहरुले यस्तो आशंका गरेका हुन् । सरकारले आयोजनाको १४ औं संशोधनबाट २०८२ साल पुस १६ गतेसम्म म्याद थप गरेको छ । तर फिनिसिङको काम जम्मा ५ प्रतिशत मात्रै सम्पन्न भएकाले अझै सकिन समय लाग्ने उनीहरुको अनुमान छ ।
राष्ट्रिय सभा अन्तर्गतको सार्वजनिक नीति तथा प्रत्यायोजित विधायन समितिले अनुगमन गर्ने क्रममा अझै धेरै कामहरु गर्न बाँकी रहेको सांसदहरुले बताए । समितिका सभापति मायाप्रसाद शर्माले अझै धेरै काम गर्न बाँकी रहेकाले समयमै सम्पन्न हुनेमा शंका व्यक्त गर्नुभयो । अब म्याद पुनः थप्ने गरी काम हुनु नहुने भन्दै निर्माण कम्पनीको ध्यानाकर्षण गराउनु भयो । काममा धेरै नै ढिलासुस्ती भइरहेको आरोप लगाउनु भयो । उहाँले भन्नुभयो, ‘पुस १६ गतेसम्मको लागि म्याद थप भएको रहेछ । अब समयमै सम्पन्न हुन्छ की हुँदैन ? अझै काम धेरै बाँकी छ । फिनिसिङको काम ढिलो हुन्छ, धेरै बाँकी छ । अब म्याद थप्ने गरी नहोस् । क्रमिक रुपले काम भइरहेको छ । तर ढिलासुस्ती छ ।’
नेकपा (एकीकृत समाजवादी) की सांसद गोमादेवी तिमल्सिनाले पटक पटक म्याद थप भएपनि काम सन्तोषजनक नरहेको बताउनु भयो । उहाँले अझै समयमै काम सम्पन्न हुनेमा आशंका व्यक्त गर्नुभयो । उहाँले भन्नुभयो, ‘नयाँ संसद भवनको निरीक्षण र अवलोकनका लागि हामी आएका छौँ । यो पटक पटक आयौँ । तर प्रगति सन्तोषजनक छैन । पुस १६ गतेसम्म पनि सकिएला जस्तो लाग्दैन ।’
नेकपा (माओवादी केन्द्र) का सांसद नरबहादुर विष्टले अझै काम सकिन दुई वर्ष लाग्ने देखिएको बताउनु भयो । फिनिसिङको काम जम्मा ५ प्रतिशत मात्रै भएको उहाँको भनाइ छ । उहाँले भन्नुभयो, ‘निरीक्षण गर्दा ५ प्रतिशत मात्रै फिनिसिङ भएको छ । यो अझै सकिन्छ जस्तो लाग्दैन । अझ दुई वर्ष लाग्छ जस्तो लागेको छ ।’
नेकपा (एकीकृत समाजवादी) की सांसद मदनकुमारी साहले पछिल्लो समय थपिएको पुस १६ गतेसम्ममा पनि काम सकिन गाह्रो रहेको बताउनु भयो । सिंहदरबारभित्रको यो अवस्था छ भने बाहिरको अवस्था कस्तो होला ? भन्दै प्रश्न गर्नुभयो । उहाँले भन्नुभयो, ‘पछिल्लो समयमा एक वर्ष जुन म्याद थपिएको छ । यो थपिएको म्यादभित्र पनि सम्पन्न हुने स्थिति देखिँदैन । बहाना धेरै छन् । पटक पटक म्याद थपिँदा समेत यो समयमा काम सकिने स्थिति छैन । सिंहदरबारभित्रको यो अवस्था छ भने बाहिरको अवस्था कस्तो छ भनेर सहजै अनुमान गर्न सकिन्छ । विकास निर्माणमा लापरवाही देखिन्छ, सरकारलाई नटेरेको देखिन्छ ।’
नयाँ निर्माणाधिन संसद भवन निर्माण आयोजनाका निर्देशक सुनिलकुमार ठाकुरले आयोजनाको १४ औं संशोधनबाट २०८२ साल पुस १६ गतेसम्म म्याद थप भएको र त्यहीअनुसार काम अघि बढिरहेको बताउनु भयो । सिभिलका काम सकिसकेको र अब फिनिसिङका काम मात्रै रहेकाले त्यसका लागि आवश्यक सामग्रीहरु पनि जोहो भइसकेकाले समयमै सकिने विश्वास व्यक्त गर्नुभयो ।उहाँले भन्नुभयो, ‘आयोजनाको १४ औं संशोधनबाट २०८२ साल पुस १६ गतेसम्म म्याद थप भएको छ । त्यहीअनुसार दुवै निर्माण व्यवसायीलाई काम सम्पन्न गर्नलाई कार्ययोजना दिएर काम गरिरहेका छौँ । अधिकतम काम गर्ने हो । सिभिलका काम सकिसकेका छन् । फिनिसिङ काम बाँकी हो । त्यसको लागि चाहिने सामान जोहो भइसकेकाले समयमै काम सम्पन्न गर्नेछौँ ।’
सांसदहरुले सबैले जिम्मेवारी लिइ ताकेता गरेर भएपनि छिटो भन्दा छिटो सम्पन्न गराउने काममा लाग्नुपर्ने बताउनु भयो ।
