सुर्खेत। सुर्खेतमा युवकको आँखामा धारिलो चक्कु प्रहार गरेर फरार भएका अभियुक्तलाई प्रहरीले काठमाडौँबाट पक्राउ गरेको छ।
जिल्ला प्रहरी कार्यालय, सुर्खेतका अनुसार, ज्यान मार्ने उद्योग तथा अङ्गभङ्ग मुद्दामा फरार रहेका जुम्ला निवासी नवराज रावतलाई काठमाडौँ महानगरपालिका–१० बुद्धनगरमा लुकिरहेको अवस्थामा फेला पारी पक्राउ गरिएको हो।
प्रहरी नायव उपरीक्षक (डीएसपी) मोहनजंग बुढ्थापाले बताए अनुसार, साउन ९ गते राति करिब १२ बजे वीरेन्द्रनगर नगरपालिका–६ बसपार्कको माथिल्लो गेटमा २२ वर्षीय ललित परियारमाथि धारिलो चक्कुले आँखामा प्रहार गरिएको थियो। आक्रमणपछि रावत घटनास्थलबाट फरार भएका थिए भने परियार गम्भीर घाइते भएका थिए।
निरन्तर खोजीपछि काठमाडौँ उपत्यका अपराध अनुसन्धान कार्यालयको सहयोगमा रावतलाई पक्राउ गरिएको प्रहरीले जनाएको छ।
पक्राउ परेका रावतलाई बुधबार जिल्ला प्रहरी कार्यालय, सुर्खेतमा उपस्थित गराई आवश्यक कानुनी कारबाहीका लागि थप अनुसन्धान अघि बढाइएको डीएसपी बुढ्थापाले जानकारी दिएका छन्।
