काठमाडौँ । अस्ट्रेलियामा जारी टप एण्ड ट्वान्टी–२० शृङ्खलाअन्तर्गत नेपाल पाकिस्तान शाहीन्ससँग पराजित भएको छ ।
भर्खरै सम्पन्न खेलान नेपाल १ रनले पराजित भएको हो । साहीन्सले दिएको १४५ रनको लक्ष्य पछ्याएको नेपालले २० ओभरमा ७ विकेट गुमाएर १४३ रन जोड्यो ।
नेपाललाई अन्तिम एक बलमा तीन रन आवश्यक थियो । क्रिजमा दिपेन्द्र सिंह ऐरी थिए । उनले स्वीप गरेर प्रहार गरेको बल साहीन्सका खेलाडीले चतुरपूर्ण रुपमा पकड जमाउँदै ऐरीलाई रनआउट गरेपछि नेपालले खेल गुमायो ।
कप्तान रोहित पौडेलले अर्धशतकीय पारी खेलेपनि हार टार्न सकेनन् । उनले ४४ बलमा ५२ रन जोडे । यस्तै, दिपेन्द्र सिंह ऐरीले २१ बलमा ४१ रनको योगदान दिए । आशिफ शेखले २७ रन जोडे ।
साहीन्सका लागि मोहम्मद वसिम र फैसल अकरमले दुई–दुई विकेट र मोहम्मद सलमानले एक विकेट लिए ।
त्यसअघि अष्ट्रेलियाको डार्विनस्थित मरारा क्रिकेट मैदान–२ मा टस जितेर पहिला ब्याटिङ रोजेको शाहीन्सले निर्धारित २० ओभरमा नौ विकेट गुमाएर एक सय ४४ रनको योगफल बनायो ।
पाकिस्तान शाहीन्सका कप्तान इरफान खानले सर्वाधिक ४२ रनको योगदान दिए । उनले २६ बलमा तीन चौका र एक छक्का प्रहार गर्दै ४२ रन बनाएका हुन् । मोहमद वासिमले २३, अबदुल समादले २६ तथा यासिर खानले १८ रन जोडे ।
बलिङतर्फ नेपालका सोमपाल कामीले तीन विकेट लिए भने नन्दन यादव र दिपेन्द्रसिंह ऐरीले समान दुई–दुई विकेट लिँदा कुशल भुर्तेलले एक विकेट झारे ।
योसँगै छ खेलमा नेपालले चार खेलमा हार तथा दुई खेलमा जित हासिल गरेको छ ।
नेपालले नर्दर्न टेरिटोरी स्ट्राइकरसँग ४२, बङ्गलादेश ‘ए’ सँग ३२ र मलेबर्न स्टार्स एकेडेमीसँग ३१ रनले पराजित भएको थियो ।
त्यस्तै नेपालले होबर्ट हुरिक्यान्स एकेडेमीविरुद्ध ६६ र मेलबर्न रेनेगेड्स एकेडेमीविरुद्ध ३३ रनको जित निकालेको थियो ।
