काठमाडौं । नेपाली कांग्रेसमा नियमित कि विशेष महाधिवेशन गर्ने भन्नेमा अन्योल देखिएको छ । पार्टी पुनर्गठनको आवाज उठाउँदै तत्काल महाधिवेशन गर्नुपर्ने माग हुँदै आएको छ । तर कुन महाधिवेशन गर्ने भन्नेमा पदाधिकारी बैठकमा सहमति हुन नसक्दा केन्द्रीय समितिले पनि निर्णय गर्न नसकेको हो ।
महाधिवेशनबारे निश्चित नभएपछि कांग्रेसका युवा नेताहरूको पहलमा विधानको धारा १७ (१) अनुसार ५४ प्रतिशत महाधिवेशन प्रतिनिधिहरूको हस्ताक्षरसहित विशेष महाधिवेशनको माग गरिएको हो । युवा नेताहरू गुरुराज घिमिरे, देवराज चालिसे, सुरेन्द्रप्रसाद चौधरी, सुवासकुमार पोखरेल, उज्ज्वल बराल, रमेशप्रसाद धमला, दिक्पाल शाही, भरत खड्कासहित १७ जनाको हस्ताक्षरसहित पार्टी केन्द्रीय कार्यालय सानेपामा पुगेर विशेष महाधिवेशनको निवेदन दर्ता गराएका हुन् ।
कार्यवाहक सभापति पूर्णबहादुर खड्कालाई विशेष महाधिवेशन बोलाउनुपर्नाको कारणबारेको पत्र र पार्टी केन्द्रीय कार्यालयका मुख्य सचिव कृष्ण पौडेललाई महाधिवेशन प्रतिनिधिहरूको हस्ताक्षरको सूची उनीहरुले बुझाएका छन् । पार्टीको नीति, नेतृत्व र संरचनाबारे गहन छलफल र आत्मसमीक्षाका लागि केन्द्रीय कार्यसमितिको सीमित निर्णय अपर्याप्त रहेकाले नियमित वा विशेष महाधिवेशन मात्रै अहिलेको विकल्प भएको उनीहरूको भनाइ छ ।
कांग्रेसमा १४ औं महाधिवेशनका प्रतिनिधिको संख्या ४ हजार ७ सय ४३ छ । त्यसमध्ये निधन भएका र पार्टी छाडेकाको संख्या १ सय २८ छ । विशेष महाधिवेशनको माग राखेर हस्ताक्षर गर्नेको संख्या २४ सय ८८ छ ।
नियमित वा विशेष महाधिवेशन भन्ने विषय आजदेखि सुरु हुने केन्द्रीय कार्यसमितिको बैठकमा हुने छलफलबाट निर्धारण हुने छ ।
मंसिरभित्रै नियमित महाधिवेशन हुन्छ कि हुन्न भन्नेमा सुनिश्चितता अहिलेसम्म भएको छैन । त्यही कारण विशेष महाधिवेशनको माग गर्दै दबाबसमेत बढेको हो ।
