काठमाडौँ। गृहसचिव राजकुमार श्रेष्ठले आज मन्त्रालयमा पदभार ग्रहण गर्नुभएको छ ।
गृह मन्त्रालयमा आयोजित स्वागत तथा बिदाइ कार्यक्रममा गृहमन्त्री ओमप्रकाश अर्यालले सरुवा भई आउनुभएका गृहसचिव श्रेष्ठलाई स्वागत गर्नुका साथै नयाँ जिम्मेवारीमा सरुवा भई जानुभएका सचिव रामेश्वर दङ्गाललाई बिदाइ गर्नुभयो ।
गृहमन्त्री अर्यालको निजी सचिवालयकाअनुसार गृहसचिवको नयाँ जिम्मेवारी सम्हाल्नुभएका सचिव श्रेष्ठलाई मन्त्री अर्यालले सफल कार्यकालको शुभकामना दिनुभएको हो । मन्त्रालयमा बसेर आजसम्म गर्नुभएको कार्यप्रति सचिव दङ्गाललाई धन्यवाद दिनुभयो ।
गृहसचिव श्रेष्ठले सरकारले दिएको कार्यभार आफूले सबै कर्मचारी साथीहरुको साथ सहयोगबाट सक्दो कुशलतापूर्वक निर्वाह गर्ने प्रतिबद्धता व्यक्त गर्नुभयो । उहाँले बदलिँदो परिस्थिति र नागरिकको जनभावना अनुरुप सेवा प्रदान गर्न सबै कर्मचारीहरूलाई निर्देशन समेत दिनुभयो ।
मन्त्रिपरिषद्को पुस ११ गते बसेको बैठकले सचिव दङ्गालको लोकसेवा आयोगमा र सचिव श्रेष्ठको प्रधानमन्त्री तथा मन्त्रिपरिषद्को कार्यालयबाट गृहमा सरुवा गर्ने निर्णय गरेको थियो । रासस
