काठमाडौँ ।नेपाली कांग्रेसको विशेष महाधिवेशनमा सहभागी हुन अहिलेसम्म ४९.३४ प्रतिशत महाधिवेशन प्रतिनिधिले नाम दर्ता गराएका छन्। विशेष महाधिवेशन स्थलमा नाम दर्ता गर्ने क्रम अझै जारी रहेको पार्टी स्रोतले जनाएको छ।
नेपाली कांग्रेसमा कुल ४ हजार ७ सय ४३ जना महाधिवेशन प्रतिनिधि रहेका छन्। यसअघि असोज २९ गते ५४.५८ प्रतिशत प्रतिनिधिले हस्ताक्षरसहित विशेष महाधिवेशनको माग गरेका थिए। सोही मागका आधारमा अहिले विशेष महाधिवेशन सञ्चालन भइरहेको हो।
विशेष महाधिवेशनको पक्षमा काठमाडौं आइपुगेका प्रतिनिधिहरूको संख्या बहुमतको नजिक पुगिसकेको बताइएको छ। आयोजक पक्षले महाधिवेशनमा ६० प्रतिशतभन्दा बढी प्रतिनिधिको सहभागिता हुने दाबी गरेको छ।
