काठमाडौँ । फागुन २१ मा हुने प्रतिनिधिसभा निर्वाचनका लागि दलहरूले निर्वाचन आयोगमा बुझाएको समानुपातिक बन्दसूचीबाट ५४ जनाले नाम फिर्ता लिन निवेदन दिएका छन्।
निर्वाचन आयोगका प्रवक्ता नारायणप्रसाद भट्टराईका अनुसार सोमबार दिउँसो ३ बजेसम्म नाम फिर्ताका लागि ५४ वटा निवेदन प्राप्त भएका छन्। आयोगले समानुपातिकतर्फका उम्मेदवारलाई बिहान १० बजेदेखि अपराह्न ४ बजेसम्म नाम फिर्ता लिन समय दिएको छ। अझै करिब एक घण्टा समय बाँकी रहेकाले निवेदन संख्या बढ्न सक्ने उनले जानकारी दिए।
नाम फिर्ता लिनेमा जनमत पार्टीका उम्मेदवारको संख्या सबैभन्दा बढी छ। जनमत पार्टीका २० जनाले नाम फिर्ताको निवेदन दिएका छन्। त्यसपछि राष्ट्रिय स्वतन्त्र पार्टीका १२ जना र नेकपा (एमाले) का ३ जना उम्मेदवार रहेका छन्। निर्वाचन आयोग स्रोतका अनुसार यो संख्या अझै बढ्न सक्ने सम्भावना छ।
एमालेतर्फ खसआर्य कोटाबाट ठाकुरप्रसाद शर्मा, मधेशी महिला कोटाबाट अंशु सिंह तथा आदिवासी जनजाति कोटाबाट विजयसिंह लामाले नाम फिर्ता लिने निवेदन दिएका छन्।
बन्दसूचीमा नाम रहेका उम्मेदवारहरू स्वयं उपस्थित भएर नाम फिर्ताको निवेदन दिइरहेका छन्। गत १३ र १४ पुसमा ५८ वटा चुनाव चिह्नबाट प्रतिस्पर्धा गर्ने गरी ६४ राजनीतिक दलले समानुपातिकतर्फ प्रतिनिधिसभा निर्वाचनका लागि बन्दसूची बुझाएका थिए।
प्रतिनिधिसभाका कुल २७५ सिटमध्ये ११० सिट समानुपातिक निर्वाचन प्रणालीबाट चयन हुने व्यवस्था छ।
