टाङ्गियर । टाङ्गियरमा अन्तिम सिटी बज्दा इजिप्टका कप्तान मोहम्मद सलाहका आँखामा आँसु थिएनन् । केवल हल्का मुस्कान देखिन्थ्यो, तर त्यस मुस्कानभित्र गहिरो निराशा लुकेको स्पष्ट थियो । अफ्रिका कप अफ नेसन्स फुटबल प्रतियोगितामा इजिप्टको यात्रा फेरि सेमिफाइनलमै टुंगियो । यसपटक पनि उनीहरू सेनेगल तथा सलाहका पूर्व लिभरपुल सहकर्मी साडियो मानेको टोलीसँग पराजित भए ।
मोरक्कोमा भएको प्रतियोगितामा सलाहले खेलेका पाँच खेलमा चार गोल गर्दै इजिप्टलाई सेमिफाइनलसम्म पुर्याएका थिए । आइभोरी कोस्टविरुद्धको क्वार्टरफाइनल जितपछि उनले यस क्याम्पलाई आफ्नो करिअरकै “सबैभन्दा राम्रो क्याम्प” भनेका थिए ।
“हामी सबै निकै नजिक छौँ । एक–अर्कालाई माया गर्छौँ, सँगै समय बिताउँछौँ, हाम्रो हाँसो–ठट्टा अद्भुत छ र हामी मैदानभित्र तथा मैदानबाहिर दुवै ठाउँमा कडा मेहनत गर्छौँ,” सलाहले भनेका थिए ।
लिभरपुल फर्किने तयारी, भविष्य अझै अनिश्चित
शनिबार क्यासाब्लान्कामा नाइजेरियाविरुद्ध हुने तेस्रो स्थानका लागि खेलपछि सलाह बेलायत फर्किने अपेक्षा गरिएको छ । तर उनको लिभरपुलसँगको भविष्य अझै अनिश्चित नै छ ।
सलाहले लिभरपुलका लागि अन्तिम पटक नोभेम्बर २६ मा च्याम्पियन्स लिगअन्तर्गत पिएसभि आइन्डहोभेनविरुद्ध खेलेका थिए, जहाँ प्रशिक्षक आर्ने स्लटको टोली ४–१ ले पराजित भएको थियो । त्यसयता लिभरपुल ११ खेलसम्म अपराजित रहे पनि (६ जित र ५ बराबरी) टोलीको प्रदर्शन खासै प्रभावशाली नभएको टिप्पणी हुँदै आएको छ । स्वयं प्रशिक्षक स्लटले पनि टोलीको खेल “निरास र बोरिङ” भएको आलोचनासँग पूर्ण रूपमा असहमत नभएको स्वीकार गरेका छन् ।
विवाद, माफी र समर्थकको साथ
करिब एक महिनाअघि लिड्समा दिएको अन्तर्वार्तामा सलाहले लगातार तीन खेल बेन्चमा राखिएको विषयमा असन्तुष्टि जनाउँदै क्लबले आफूलाई “बसअगाडि धकेलेको” आरोप लगाएका थिए । उनले प्रशिक्षक स्लटसँगको सम्बन्ध बिग्रिएको दाबीसमेत गरेका थिए । त्यसपछि इन्टर मिलानविरुद्धको खेलमा उनी टोलीमा समावेश भएनन्, तर क्लबले उनलाई जरिवाना भने गरेन ।
केही दिनपछि ब्राइटनविरुद्धको खेलमा उनी टोलीमा फर्किए । जो गोमेज घाइते भएपछि सलाह पहिलो हाफमै मैदान प्रवेश गरेका थिए । दोस्रो हाफमा उनले एक असिस्ट गरे र एनफिल्ड मैदानमा समर्थकबाट न्यानो स्वागत पाए । खेलपछि चारै दिशातर्फ घुम्दै उनले समर्थकको अभिवादन स्वीकार गरे । यही खेल राष्ट्रिय टोलीमा सामेल हुनुअघिको उनको अन्तिम खेल बनेको थियो ।
चोटले कमजोर बनेको लिभरपुल
सलाह अनुपस्थित रहँदा पनि लिभरपुल अपराजित रहे तापनि टोलीका मुख्य स्ट्राइकर अलेक्जेन्डर इसाक कम्तीमा मार्चसम्म घाइते भएर बाहिरिएका छन् । त्यस्तै, डिफेन्डर कोनर ब्राडली घुँडाको चोटका कारण सिजनभर खेल्न नसक्ने भएका छन् ।
सलाह कहिले मैदानमा फर्किन्छन् ?
अन्तर्राष्ट्रिय फुटबल महासंघको नियमअनुसार राष्ट्रिय टोलीको अन्तिम खेलपछि भोलिपल्ट बिहानसम्म खेलाडी क्लबमा फर्कन पाउँदैनन् । त्यसैले शनिबार बर्नलीविरुद्ध हुने खेलमा सलाह उपलब्ध हुने छैनन् । इजिप्टको तेस्रो स्थानका लागि खेल शनिबार नै भएकाले उनी आइतबार बेलायत फर्किनेछन् ।
अफ्रिका कपको इजिप्टको यात्रा समाप्त भएपछि मात्र लिभरपुलले सलाहको पुनरागमनबारे औपचारिक योजना सार्वजनिक गर्ने जनाएको छ । सम्भावना अनुसार उनी अर्को साता मार्सेइयविरुद्धको खेलबाट टोलीमा फर्कन सक्छन् । त्यसपछि लिभरपुलले च्याम्पियन्स लिग र त्यसपछि प्रिमियर लिगअन्तर्गत बोर्नमाउथसँग प्रतिस्पर्धा गर्नेछ ।
