रौतहट। रौतहटको गौर नगरपालिकाको सवगढा गाउँमा सामाजिक सद्भाव कायम गर्न छ बुँदे सहमति गरिएको छ ।
बिहीबार राति सवगढा गाउँमा विवाहको समयमा बाजा बजाएको विषयमा दुई समुदायबीच भएको विवादले उग्र रुप लिँदा तनावग्रस्त भएको थियो । सोही विषयमा आज रौतहटका प्रमुख जिल्ला अधिकारी दिनेशसागर भुसालको अध्यक्षतामा बसेको बैठकले सामाजिक सद्भाव कायम गर्न छ बुँदे सहमति गरेको हो ।
गौर नगरपालिका–६ सवगढा बस्ने सत्यनारायण साहकी छोरीको विवाहको जन्ती बौधिमाई नगरपालिका–९ सरमुजवाबाट सवगढा आउने क्रममा मस्जिद अगाडि बाजा बजाइएको विषयलाई लिएर मुस्लिम पक्ष र जन्ती पक्षबीच विवाद भएको थियो । विवादमा दुई पक्षबीच ढुङ्गा हानाहान हुँदा तनावग्रस्त भएको थियो । झडपमा प्रहरीसहित दर्जनौँ मानिस घाइते भएका थिए ।
घटनापछि जिल्ला प्रशासन कार्यालय गौरमा प्रजिअ भुसालको अध्यक्षतामा बैठक बसेको थियो । सो बैठकमा दुवै पक्षका प्रतिनिधि बोलाइ सामाजिक सद्भाव कायम गर्न वार्ता गरिएको थियो ।
सामाजिक सद्भाव कायम राख्न सबैलाई संयमता अपनाउन प्रमुख जिल्ला अधिकारी भुसालले आग्रह गर्नुभएको छ । हिन्दू पक्ष र मुस्लिम पक्षबीच सौहार्दपूर्ण वातावरणमा वार्ता सम्पन्न भएको प्रजिअ भुसालले जानकारी दिनुभयो । दुवै पक्षबीच छ बुँदे सहमति भएको र यही फागुन २१ गते हुने निर्वाचनमा सबैको सहभागिता सुनिश्चित गराउने वातावरण सृजना गर्ने प्रतिबद्धता दोहो-याइएको उहाँले बताउनुभयो ।
गए राति भएको झड्पमा छ जना घाइते भएकालाई उपचारका लागि प्रादेशिक अस्पताल गौर पठाइएको छ । सबैको अवस्था सामान्य रहेको जनाइएको छ ।
स्थितिलाई नियन्त्रणमा लिन १२ राउण्ड हवाइ फायर र ४० राउण्ड अश्रु ग्यास प्रहार गरिएको जिल्ला प्रहरीका प्रहरी नायब उपरीक्षक विष्णुप्रदीप बस्यालले जानकारी दिनुभयो । रासस
