भारतको जम्मु–कश्मीरमा भारत र पाकिस्तानका सैनिकबीच भिड्न्त हुँदा भारतीय सेनामा कार्यरत एक नेपालीको मृत्यु भएको छ । बुधबार भारत र पाकिस्तानका सैनिकबीचको मुठभेडमा नेपालका अर्जुन थापा मगरको मृत्यु भएको भारतीय सञ्चारमाध्यमले जनाएका छन् । नयाँ वर्षकै पहिलो दिन जम्मु–कश्मीरको नौशहरा क्षेत्रमा सर्च अपरेशनका क्रममा भिड्न्त हुँदा भारतीय सेनामा कार्यरत गोरखाका अर्जुन थापा मगरसहित दुई सैनिकको मृत्यु भएको भारतीय सञ्चारमाध्यमले जनाएका हुन् ।
अर्जुनसँगै भारतको महाराष्ट्रस्थित सतारा जिल्ला निवासी सावन्त सन्दीपको पनि मृत्यु भएको छ । गोरखा नगरपालिका–५ ठूले रिपका २५ वर्षीय अर्जुन पाँच वर्ष अघि भारतीय सेनामा भर्ती भएका थिए । भारतीय सेनाले अर्जुनका परिवारलाई घटनाबारे जानकारी दिइसकेको बताइएको छ । अर्जुनका परिवारलाई शव लिनका लागि भारतीय सेनाले बोलाएको छ ।
नेपाली सीमासम्म उनको शव भारतीय सेनाले नै ल्याइदिने जनाइएको छ । बुधबार जम्मु–कश्मीरको राजौरी जिल्लाको नौशहरामा भारत र पाकिस्तानी सेनाहरु बिच मुठभेड भएको थियो ।
