काठमाडौं । वैदेशिक रोजगारीका लागि अष्ट्रेलिया पठाइदिन्छु भन्दै एक व्यक्तिलाई ठगी गर्ने एक महिलालाई प्रहरीले पक्राउ गरेको छ।
काठमाडौं उपत्यका अपराध अनुसन्धान कार्यालय, टेकुको टोलीले विशेष सूचनाका आधारमा अनुसन्धान गर्दै काठमाडौं महानगरपालिका–१४ बाट ५५ वर्षीय निमा घिमिरेलाई पक्राउ गरेको हो।
प्रहरीका अनुसार उनले बेरोजगार युवायुवतीलाई आकर्षक तलबको प्रलोभन देखाई अष्ट्रेलिया लैजाने भन्दै लामो समयसम्म झुक्याएर रकम असुल गरेका थिए। पीडितलाई विदेश नपठाई सम्पर्कविहीन भएपछि दिएको उजुरीका आधारमा उनलाई नियन्त्रणमा लिइएको हो।
उनबाट १२ लाख रुपैयाँ ठगी गरेको खुलेको प्रहरीले जनाएको छ। हाल उनलाई थप अनुसन्धान तथा आवश्यक कारबाहीका लागि वैदेशिक रोजगार विभाग, ताहाचल काठमाडौं पठाइएको छ।
प्रहरीले यस घटनामा संलग्न अन्य व्यक्तिको खोजी तथा थप अनुसन्धान जारी रहेको जनाएको छ।
