काठमाडौँ। राष्ट्रिय स्वतन्त्र पार्टी (रास्वपा) ले पहिलो चरणमा समानुपातिक सांसदलाई मन्त्री नबनाउने तयारी गरेको छ । पार्टी स्रोतका अनुसार, समानुपातिक सांसदलाई मन्त्री नबनाउने बारेमा रास्वपाका शीर्ष नेताहरुबीच सैद्धान्तिक सहमति भइसकेको छ ।
रास्वपाले प्रतिनिधि सभा निर्वाचनमा प्रत्यक्षतर्फ १२५ र समानुपातिकतर्फ ५७ गरी १८२ सिट जितेको छ ।
निर्वाचन आयोगले आजै सांसदहरुको पूर्ण विवरण राष्ट्रपति कार्यालयमा बुझाए लगत्तै नयाँ सरकार गठनका लागि औपचारिक बाटो खुल्नेछ । रास्वपाले नयाँ सरकार गठनको गृहकार्य पनि गरिरहेको छ । सम्भवत: यही चैत १० गते नयाँ सरकारको शपथ हुनेछ ।
रास्वपामा यसअघि नै वरिष्ठ नेता बालेन्द्र शाह (बालेन) लाई प्रधानमन्त्री बनाउने सहमति भइसकेको छ ।
बालेन नेतृत्वको मन्त्रिपरिषदमा विषयगत विज्ञताका आधारमा मन्त्री चयन गर्ने रास्वपाको तयारी छ । रास्वपाले एकल सरकार बनाउने भएपछि पहिलो चरणमै मन्त्री बन्न केही सांसदहरु ‘लबिइङ’मा लागेको बताइएको छ । मन्त्री बन्नकै लागि केही सांसदले मिडिया ट्रायल समेत गर्न थालेको चर्चा रास्वपाभित्रै हुन थालेको छ ।
रास्वपा सभापति रवि लामिछानेले हिजो नवनिर्वाचित सांसदहरुको अभिमूखीकरणमा पनि केही सांसदले मन्त्री बन्न दौडधुप गरेको संकेत गरेका थिए ।
रास्वपामा प्रत्यक्षतर्फबाट शिक्षा, स्वास्थ्य, पूर्वाधार, अर्थतन्त्र, परराष्ट्र, जनस्वास्थ्य, कानुन लगायत थुप्रै क्षेत्रका विज्ञ निर्वाचित भएका छन् । समानुपातिकतर्फ पनि केही विज्ञ निर्वाचित भएका छन् ।
सभापति लामिछाने र वरिष्ठ नेता शाहसहित पार्टीका केही उच्च नेताहरुले परिणाम दिन सक्ने व्यक्तिहरुलाई मन्त्री बनाउने गरी गृहकार्य गरिरहेको स्रोतको भनाई छ ।
चैत १२ गते नवनिर्वाचित सांसदहरुलाई शपथ ग्रहण गराउने र १५ गते संसदको पहिलो बैठक आह्वान गर्ने संसद सचिवालयको तयारी छ ।
