भारतका पूर्वप्रधानमन्त्री जवाहरलाल नेहरुका बारेमा आपत्तिजनक टिप्पणी गरेपछि बलिउड अभिनेतृ पायल रोहत्गी पक्राउ परेकी छन् । पायलले नेहरु परिवारबारे गत अक्टोबरमा टिप्पणी गरेपछि राजस्थानको बुन्दी प्रहरीले आइतबार उनलाई पक्राउ गरेको हो । उनले आफ्नो फेसबुकमार्फत भिडियो बनाई टिप्पणी गरेकी थिइन् । अभिनेत्री पायलले जवाहरलाल नेहरुका पिता मोतीलाल नेहरु र जवाहरलालका श्रीमतीका बारेमा टिप्पणी गरेकी थिइन् ।
उक्त भिडियो सार्वजनिक भएपछि कंग्रेसका युवानेता चर्मेस शर्माले सामाजिक सञ्जालमार्फत गालीगलौज गरेको आरोपमा मुद्दा दायर गरेका थिए । प्रहरीले उनलाई यसबारे उत्तर दिन मागसमेत गरेको थियो । त्यसलगत्तै उनले आफ्नो टिप्पणीबारे माफीसमेत मागेकी थिइन् ।
शर्माले उक्त भिडियोले भारतको सम्बन्ध अरु राष्ट्रसँग बिग्रिने भन्दै विरोध गरेका थिए । पायल बलिउड अभिनेत्रीका साथै मोडेल समेत हुन् । यसअघि पनि उनी विभिन्न विषयमा टिप्पणी दिँदा पटकपटक विवादमा तानिँदै आएकी थिइन् ।
