काठमाडौं। काठमाडौंका पूर्वप्रमुख जिल्ला अधिकारी छवि रिजाल हाजिरी जमानीमा रिहा भएका छन् ।
काठमाडौं उपत्यका अपराध अनुसन्धान कार्यालयको टोलीले उनलाई सुविधानगरस्थित निवासबाटै पक्राउ गरेको थियो। तर, पक्राउ परेको केही समयमै जिल्ला प्रहरी परिसर काठमाडौंले उनलाई भतिजको जिम्मा लगाएर छाडेको छ।
परिसरका प्रवक्ता एसपी पवनकुमार भट्टराईले आवश्यक कागजात बुझेर रिजाललाई खोजेका बखत उपस्थित हुने सर्तमा जिम्मा जमानीमा छाडिएको बताएका छन्।
रिजालमाथि गत भदौ २३ र २४ गते भएको जेनजी आन्दोलनमा दमन गरेको आरोप छ। आन्दोलनका बेला उनी काठमाडौंका सिडिओ थिए।
आन्दोलनमा भएको दमनबारे छानबिन गर्न गठित गौरीबहादुर कार्की नेतृत्वको जाँचबुझ आयोगले रिजाललाई समेत कारबाही गर्न सिफारिस गरेको थियो।
