काठमाडौं । सरकारको स्वामित्वमा रहेको भक्तपुरस्थित शहीद धर्मभक्त राष्ट्रिय प्रत्यारोपण केन्द्र समस्या नै समस्याले गाँजिएको छ । सो केन्द्रका अधिकांश मेसिन उपयोगविहीन अवस्थामा छन् भने केही सेवा बन्द भएका छन् । सरकारले केन्द्रलाई प्राथमिकतामा नराख्दा र पर्याप्त चिकित्सक अभावका कारण केन्द्रमा भएका मेसिन पनि उपयोगमा आउन नसकेको पाइएको छ । मेसिन अभावमा बिरामी मर्कामा परेका छन् ।
केन्द्रका अनुसार केन्द्र स्थापना भएदेखि हालसम्म ६ सय ७२ जनाको मिर्गौला प्रत्यारोपण गरिएको छ। अस्पतालले बिरामीले प्रभावकारी रूपमा सेवा दिन नसकेको देखिएको छ। राजधानी दैनिकले गरेको स्थलगत रिपोर्टिङका क्रममा बिरामीले प्रभावकारी तवरबाट सेवा पाउन नसकेको गुनासो गरेका थिए । यस्तै, केन्द्रले निकट भविष्यमा कलेजो प्रत्यारोपणको तयारी थालिएको जनाएको छ । अस्पतालमा पुगेका बिरामीले सहज तरिकाले सेवा प्रवाह नपाएको गुनासो गरेका छन् ।
एक जना सेवाग्राहीले भने, ‘के गर्नु डाक्टरहरूले वास्तै गर्दैनन् । पालो नै आउँदैन, कति कुरौं ?’ एक्मो मेसिन उपयोगमा आउन सकेको छैन । चिकित्सकका अनुसार भेन्टिलेटरले धान्न नसक्ने बिरामीका लागि सो मेसिन प्रयोग हुने गर्छ । पछिल्लो आठ महिनायता कलेजो प्रत्यारोपण हुन सकेको छैन । हेपोटोलोजिस्ट पर्याप्त मात्रामा नहुँदा सो कार्यक्रम सञ्चालनमा आउन नसकेको अस्पताल प्रशासनले जनाएको छ ।
पछिल्लो समय मुटुको शल्यक्रियासमेत केन्द्रबाट हुन सकेको छैन । पर्याप्त चिकित्सकको अभावमा सो कार्यक्रम सञ्चालनमा नआएको बताइएको छ । हृदयघात हुँदा बचाउन प्रयोग हुने मेसिन क्याथ ल्याब प्रभावकारी रूपमा प्रयोगमा नआएको पाइएको छ । अस्पताल स्रोतका अनुसार सो मेसिनले सातामा दुईदेखि तीन जनाको एन्जिओग्राम गर्छ । पर्याप्त कार्डियोलोजिस्टको अभावमा मेसिन प्रभावकारी रूपमा प्रयोगमा आउन सकेको छैन ।
स्वास्थ्य मन्त्रालयले विकास समिति ऐन २०१३ को दफा ३ को अधिकार प्रयोग गरी मानव अंग विकास समिति गठन, आदेश २०६८ अनुसार ११ वैशाख २०६९ मा ओपीडी सेवा सुरुवात गरेको थियो । यस्तै, केन्द्रले २७ कात्तिक २०६९ मा हेमोडायलासिस सेवा सुरु गरेको र सोही वर्षको ६ माघ २०६९ बाट मिर्गौला प्रत्यारोपण सेवा सुरु गरेको थियो । राजधानी दैनिकबाट
