कैलाली । सुदूरपश्चिम प्रदेशसभाको बैठक पुनः स्थगित भएको छ । प्रमुख प्रतिपक्षी दल नेपाली कांग्रेस र राजपा उपस्थित नभएपछि बैठक कार्यसूचीमा प्रवेशै नगरी चौथो पटक स्थगित भएको छ।
आइतबार दिउँसो ३ बजेका लागि बोलाइएको बैठक प्रतिपक्षी दलको अनुपस्थित रहेपछि सभामुख अर्जुनबहादुर थापाले प्रतिपक्षी दलको सभामा उपस्थिती नरहेको भन्दै असार १७ गतेसम्मका लागि बैठक स्थगित गरेको घोषणा गरे ।
यसअधि पनि असार ११ गते कांग्रेस र राजपाले अवरोध सिर्जना गर्ने देखिएपछि तय बैठक स्थगित गरिएको थियो । यस्तै गत असार ५ गतेको प्रदेशसभा बैठकमा प्रमुख प्रतिपक्षी दल नेपाली कांग्रेस र राजपाले बजेटमाथि असन्तुष्टि जनाउँदै अवरोध सिर्जना गरेपछि सभामुखले असार ७ सम्मका लागि बैठक स्थगित गरेर ११ गतेका लागि आह्वान गरेको थियो ।
बजेट त्रुटिपूर्ण भएकाले संशोधन हुुनुपर्ने प्रमुख प्रतिपक्षी दल नेपाली कांग्रेसलगायतको माग छ । तर, सत्तारुढ दल बजेटको बचाउमा छ । सरकारले आर्थिक वर्ष २०७६/०७७ का लागि ल्याएको बजेटमा असन्तुष्टि जनाउँदै कांग्रेस र राजपाले यसअघि पनि रातो किताब जलाएका थिए ।
सुदूरपश्चिम प्रदेश सरकारले आर्थिक वर्ष २०७६/७७ का लागि असार १ गते २८ अर्ब १६ करोड २० लाख ३५ हजारको बजेट ल्याएको थियो ।
