काठमाडौँ — नेपाली कांग्रेसको जारी १४ औँ महाधिवेशनमा सभापति शेरबहादुर देउवा र नेता कृष्णप्रसाद सिटौला पक्षबीच सहकार्य गर्ने सहमति भएको छ । यी दुबै समूहबीच केही समयअघि देखि नै प्रदेश र जिल्ला तहमा भएका निर्वाचनहरुमा सहकार्य भइरहेका थिए ।
देउवा र सिटौलाले महाधिवेशन उद्घाटन गर्नुभन्दा अघि बालुवाटारमा बसेर सहमति गरेको समाचार बाहिरिएको छ । यो सहमति साँच्चिकै कार्यान्वयनमा आए देउवा पक्षबाट महामन्त्रीका आकाँक्षीहरु बालकृष्ण खाण, डा प्रकाशशरण महत र ज्ञानेन्द्र बहादुर कार्कीमाथि दबाब सिर्जना हुनेछ ।
उद्घाटन सत्र सकिएपछि सिटौलाले आफूनिकट नेताहरूलाई बोलाएर सहमतिबारे जानकारी गराएका थिए । महाधिवेशन उदघाटनका अवसरमा बोल्दै सिटौलाले युवापुस्तालाई अघि बढाउन आफू तयार रहेको र त्यसका लागि त्याग गर्न पनि पछि नहट्ने बताउनु भएको थियो । देउवासँग भएको पछिल्लो सहमति अनुसार सिटौलानिकट प्रदीप पौडेल अब देउवा प्यानलबाट महामन्त्रीका उम्मेदवार बन्नेछन् ।
सहमति अनुसार अब सभापतिमा सिटौलाले देउवालाई सघाउने छन् ।
देउवाकै प्यानलबाट सिटौला पक्षका अर्का नेता उमाकान्त चौधरी सहमहामन्त्रीको उम्मेदवार बन्ने निश्चित भएको छ । महाधिवेशन उद्घाटन अगावै देउवा–सिटौलाबीच बालुवाटारमा भेटवार्ता भएको स्रोतको भनाई छ ।
