काठमाडौं । आईसीसी एकदिवसीय विश्वकप आयोजक इङ्ल्यान्डले वेस्ट इन्डिजलाई पराजित गरेको छ । शुक्रबार राति भएको खेलमा आयोजक इङ्ल्यान्डले वेस्ट इन्डिजलाई आठ विकेटले हराएको हो ।
वेस्ट इन्डिजले दिएको दुई सय १३ रनको मध्यम लक्ष्य पछ्याएको घरेलु टोली इङ्ल्यान्डले ३३.१ ओभरमा दुई विकेटको क्षतिमा लक्ष्य पूरा गरेको थियो । इङ्ल्यान्डको जितमा जोय रुटले ब्याटिङ र बलिङ दुवैमा शानदार प्रदर्शन गरे । उनले शतकीय पाली खेलेक थिए । रुटले अविजित एक सय रन बनाए । जोनी बेयरस्टले ४५, क्रिस वाक्सले ४० र बेन स्टोक्सले १० रन बनाए । वेस्ट इन्डिजका सानन् गाब्रियलले दुई विकेट लिएका थिए ।
यसअघि रोज बल स्टेडियममा टस हारेर पहिले ब्याटिङ गरेको वेस्ट इन्डिजले ४४.४ ओभर सवै विकेटको क्षतिमा दुई सय १२ रन बनाएको थियो । वेस्ट इन्डिजका लागि निकोलस पुरनले अर्धशतकीय पाली खेले । उनले ६३ रन बनाए । सिम्रन हेटमायरले ३९, प्रारम्भिक ब्याट्सम्यान क्रिस गेलले ३६, आन्द्रे रसेलले २१, कार्लोस बेथवेटले १४ र साइ होपले ११ रन बनाए ।
वेस्ट इन्डिजलाई सस्तैमा समेट्न इङ्ल्यान्डका जोफरा आर्चर र मार्क उडले तीन तीन विकेट लिए । जोय रुटले दुई तथा क्रिस वाक्स र लियाम प्लुनकेटले एक एक विकेट झारेका थिए । यस जितसँगै इङ्ल्यान्डले चार खेलबाट ६ अंक बनाउँदै तेस्रो स्थानमा उक्लिएको छ । छैटौं स्थानमा रहेको वेस्ट इन्डिजको समान खेलबाट तीन अंक छ ।
आजको खेल
दक्षिण अफ्रिका र अफगानिस्तान
शनिबार नेपाली समयानुसार साँझ ६ः१५
