एजेन्सी । भारतको नागाल्याण्डको मोन जिल्लामा सुरक्षाकर्मीबाट गोली चल्दा १३ स्थानीयले ज्यान गुमाएका छन् ।
मृतकहरु उग्रवादी संगठन एनएससीएनसँग सम्बन्धित रहेको आशंकामा सुरक्षाकर्मीले गोली चलाएको भारतीय सञ्चारमाध्यमले जनाएको छ । घटनापछि त्यस क्षेत्रमा हिंसा बढेको र सुरक्षाकर्मी र स्थानीय मानिसहरुबीच झडप समेत हुन पुगेको बताइएको छ ।
आक्रोशित स्थानीयले सुरक्षाकर्मीको गाडीमा समेत आगो लगाएका छन् । झडपमा सुरक्षाकर्मीले गोली समेत चलाएको बताइएको छ भने सुरक्षाकर्मीको एक जवान समेत मारिएका छन् ।
नागाल्याण्डका मुख्यमन्त्री निफियु रियोले शान्तिको अपिल गर्दै नागरिकहरुको हत्या निन्दनीय भएको बताएका छन् ।
गृहमन्त्री अमित शाहले ट्वीटरमार्फत दुर्भाग्यपूर्ण घटनाले दुःखी तुल्याएको भन्दै मृतकको परिवारप्रति समवेदना प्रकट गरेका छन् ।
राज्य सरकारले घटनाको उच्च जाँच एसआइटी गर्ने र पीडित परिवारहरुले न्याय पाउने आश्वासन दिएका छन् ।
