बुटवल । नेपाली कांग्रेस लुम्बिनी प्रदेश समितिको नेतृत्वका लागि पार्टीभित्रका दुई समूहले छुट्टाछुट्टै उम्मेदवारी घोषणा गरेका छन् ।
पार्टीको १४ औं महाधिवेशन अन्तर्गत लुम्बिनीमा वडा तहदेखि जिल्लासम्म संस्थापन र संस्थापन इतर पक्षले अधिकांश स्थानमा छुट्टाछुट्टै प्यानल बनाएर प्रतिस्पर्धा गरेका थिए ।
लुम्बिनी प्रदेशको अधिवेशन रुपन्देहीको भैरहवामा बिहीबार शुरु हुँदैछ ।
प्रदेश अधिवेशनमा पार्टी सभापति शेर बहादुर देउवा निकट संस्थापन पक्ष र वरिष्ट नेता रामचन्द्र पौडेल निकट संस्थापन इतर गरी दुई पक्षबीच प्रतिस्पर्धा हुने देखिएको छ ।
पार्टी सभापति शेर बहादुर देउवाको संस्थापन पक्षबाट रुपन्देहीका सांसद भरतकुमार शाह र संस्थापन इतर पक्षबाट वरिष्ठ नेता पौडेल निकट रोल्पाका जिल्ला सभापति अमर पुनले प्रदेश सभापतिका लागि उम्मेदवारी घोषणा गरेर मत माग्न शुरु गरेका छन् ।
