काठमाडौंः नेपाली कांग्रेसको १४औँ महाधिवेशनमा सहभागी महाधिवेशन प्रतिनिधिहरुले २९ वटा मतपत्रमा मत हाल्नुपर्ने भएको छ ।
एक प्रतिनिधिले २९ मतपत्रमा मत हाल्दा ४५ मिनेटदेखि एक घण्टासम्म लाग्न सक्ने पार्टी केन्द्रीय महाधिवेशन प्रचारप्रसार विभाग प्रमुख विश्वप्रकाश शर्माले बताउनुभयो ।
उहाँले डिजिटल भोटिङको विषयमा छलफल भइरहे पनि अन्तिम निर्णय नभएको जानकारी दिनुभयो ।
काठमाडौंको राष्ट्रिय सभागृह र महेन्द्र पुलिस क्लबमा मतदानको व्यवस्था मिलाउने तयारी भइरहेको पनि उहाँले बताउनुभयो । कांग्रेस महाधिवेशनअन्तर्गत यही मंसिर २७ गतेदेखि उक्त स्थानमा मतदानको तयारी गरिएको हो ।
पार्टी सभापति शेरबहादुर देउवाले आज अपराह्न ४ बजे महाधिवेशनको लोगो सार्वजनिक गर्ने कार्यक्रम छ । प्रदेश महाधिवेशनको उद्घाटनसँगै महाधिवेशनको लोगो सार्वजनिक गर्ने प्रचारप्रसार विभागका प्रमुख शर्माले बताउनुभयो ।
महाधिवेशनको नारा पनि तय गरिएको छ । शर्माका अनुसार ‘उत्साह, एकता, रूपान्तरण सफल बनाउन नेपाली कांग्रेसको १४औँ महाधिवेशन’ नारा तय गरिएको छ ।
