काठमाडौं । इटालियन सिरी ए फुटबलमा लिग लिडर युभेन्टस बिजयी भएको छ ।
सोमबार राति भएको खेलमा घरेलु टोली युभेन्टसले चिभोमाथि ३–० गोलअन्तरले पराजित गरेको हो । युभेन्टसको जितमा डौग्लास कोष्टा, इम्रे केन र ड्यानिइल रुगनीले समान १–१ गोल गरेका थिए ।
युभेन्टसका लागि उसका स्टार खेलाडि क्रिष्टियानो रोनाल्डोले भने कुनै चमत्कार गर्न सकेनन् । खेलको १३औं मिनेटमा नै कोष्टाको गोलबाट युभेन्टसले अग्रता लिएको थियो । ४५औं मिनेटमा केनको गोलसँगै युभेन्टसले २–० को दोब्बर अग्रता बनाएको थियो ।
पहिलो हाफमा २–० गोलअन्तरले अघि रहेको युभेन्टसले दोस्रो हाफमा थप एक गोल गर्दै ३–० गोलको जित निकालेको हो । खेलको ८४औं मिनेटमा रुगनीले गोल गरेका थिए ।
जितपछि लिग लिडर युभेन्टसले २० खेलबाट ५६ अंक बनाएको छ । पराजित चिभोको भने २० खेलबाट आठ अंक मात्रै रहेको छ । लिगको दोस्रो स्थानमा भने नेपोली रहेको छ । उसको २० खेलबाट ४७ अंक रहेको छ ।
