लमजुङ । नेपाली काङ्ग्रेसका सभापति एवं पूर्व प्रधानमन्त्री शेरबहादुर देउवाले सरकारले प्रेसदेखि अदालतसम्म हस्तक्षेप गरेको आरोप लगाएका छन् । उनले अदालतलाई हस्तक्षेप गरी हत्यारालाई उन्मुक्ति दिन सरकार लागिपरेको बताए ।
नेपाल प्रेस युनियन जिल्ला शाखा लमजुङको छैटौँ जिल्ला अधिवेशनमा सोमबार सभापति देउवाले भने, ‘सरकारले निर्मला पन्तको हत्यारालाई बचाउन घटनामा भेटिएका सबै प्रमाण नष्ट गरेको छ, देशमा हत्या हिंसाका घट्नामा वृद्धि हुँदासमेत सरकार मूकदर्शक बनेको छ’, ।
सरकारले जताततै हस्तक्षेप गरेर प्रजातन्त्रलाई कमजोर बनाउने खेल रचेको उनको भनाई थियो । उनले नब्बे ‘प्रतिशत राष्ट्रिय योजना काङ्ग्रेस सरकारकै पालामा सुरुआत भएको र ‘कम्युनिष्टहरू बिकाशको नाममा हावादारी कुरा मात्र गर्दै हिड्ने र काम केही नगर्ने गरेको बताएका छन् ।
सरकारले अरुले गरेको कममा पनि आफैँले गरेको भन्दै हिँड्ने प्रवृत्ति कम्युनिष्टमा हावी भएकाले विकासले गति लिन नसकेको बताएका छन् ।
