काठमाडाैं । युक्रेनमा रहेका एक नेपाली युवा प्रताप बस्नेतले युक्रेनको पक्षमा लड्न गइरहेको बताएका छन् । उनले भनेका छन्, “यो भूमि युक्रेनको हो र युक्रेनमाथि हस्तक्षेप गर्ने रुसलाई कुनै अधिकार छैन ।” सामाजिक सञ्जालमा प्राप्त उनको भिडियोमा उनले युक्रेनको पक्षमा लड्ने उनको निर्णय सही निर्णय भएको बताएका छन् ।
उनले रुसले युक्रेनमा हमला गर्दा आफू पूरा रातभर सुत्न नसकेको बताएका छन् । उनले भनेका छन्, “म युक्रेनका लागि केही राम्रो गर्न चाहन्छु किनकी म युक्रेनमा काम गर्छु, मेरो गाँस र बास पनि युक्रेनमै छ त्यसैले युक्रेनले मेरो सहयोग चाहेको अवस्थामा सैन्य बलमा समावेश हुनु मेरो कर्तव्य हो । अन्तिम अवस्थासम्म म युक्रेनका लागि लड्ने छु यसमा मलाई गर्व छ ।”
