काठमाडौँ । सभामुख अग्निप्रसाद सापकोटाले नेकपा एमालेले जारी गरेको प्रेस विज्ञप्तिप्रति आपत्ति प्रकट गर्नुभएको छ । सभामुखको सचिवालयले आज एक प्रेस नोट जारी गर्दै सभामुखको नाम जोडेर भ्रूम सृजना गर्ने र अफवाह फैलाउन खोजिएको बताएको छ ।
एमालेले मङ्गलबार एक वक्तव्य जारी गर्दै सभामुखले ‘एमसीसीसम्बन्धी प्रस्ताव टेबल गर्नुपरेमा आत्महत्या गर्छु भन्नेजस्ता आवेगपूर्ण अभिव्यक्ति’ दिएको आरोप लगाएको थियो ।
सभामुखको सचिवालयले देशको जिम्मेवार राजनीतिक दलको लेटरहेडमा सभामुखले बोल्दै नबोलेको विषयमा काल्पनिक कथ्य बनाई सोही विषयलाई जोडेर गलत भाष्य निर्माण गर्न खोजिएकोप्रति गम्भीर ध्यानाकर्षण भएको बताएको छ ।
प्रेस नोटमा भनिएको छ, “लोकतन्त्र र संवैधानिक सर्बोच्चताको पक्षमा उभिनु भएका सम्माननीय सभामुखलाई जोडेर गरिएको प्रचार राजनैतिक पूर्वाग्रहबाट प्रेरित देखिन्छ ।”
नेपालको संविधान, प्रतिनिधिसभा नियमावली र कानूनले तोकेको परिधिभित्र रहेर संवैधानिक दायित्व र जिम्मेवारी निर्वाह गर्दै आउनुभएका सभामुखविरुद्ध कपोलकल्पित एवं भ्रमपूर्ण विषयको उठान र दुस्प्रचार खेद जनक छ भन्दै सचिवालयले सभामुखले बोलेको भनी प्रचार गरिएका विषयको पुष्टि गर्न सम्बन्धित पक्षको ध्यानाकर्षण गराएको छ ।
साथै आफ्नो राजनैतिक अभीष्ट पूरा गर्न अमर्यादित एवं अशोभनीय तवरले सिर्जना गर्न खोजिएको भ्रममा नपर्न सचिवालयले सबैमा अनुरोध गरेको छ ।
