काठमाडौं । नेपालले तेस्रो टि२० अभ्यास खेलमा जिम्बावे एलाई ८ विकेटले हराएको छ ।
जितको लागि १ सय ३७ रनको विजयी लक्ष्य पछ्याएको नेपालले १५.५ ओभरमा २ विकेट गुमाउँदै लक्ष्य पूरा गर्यो । नेपालको जितमा ओपनर तथा विकेटकिपर आसिफ शेख ८७ रनमा अविजित रहे । उनले ५४ बलमा १३ चौका र १ छक्का प्रहार गरे ।
यस्तै,कुशल भुर्तेल २६ बलमा २ चौका र २ छक्कासहित ३४ रनमा बोल्ड भए । ब्रेन्डन मभुताले कुशललाई बोल्ड गरेका हुन् ।
त्यसअघि कीर्तिपुरस्थित टियु मैदानमा टस जितेर ब्याटिङ थालेको जिम्बावे ए ले निर्धारित २० ओभरमा ७ विकेट गुमाउँदै १ सय ३६ रन बनाएको थियो । जिम्बावे ए का रोय कैयाले ४१ बलमा ७ चौकासहित सर्वाधिक ४९ रन बनाए ।
ओपनर इनोसेन्ट कैया १४, टडिवानाशे मरुमानी २७ र टोनी मन्योङ्गा २ रनमा आउट भए । ल्यूक जोंगवे २३ बलमा २ चौकासहित २३ रनमा अविजित रहे ।
नेपालका लागि सन्दीप लामिछानेले ४ ओभरमा २५ रन खर्चिँदै २ विकेट लिए । सोमपाल कामी र बसिर अहमदले एक–एक विकेट लिए । तीन टि२० सिरिजमा नेपाल पहिलो खेलमा ६ विकेटले पराजित भएको थियो । दोस्रो खेल भारी वर्षाको कारण रद्द भएको थियो ।
योसँगै तीन टि२० खेलको सिरिज १–१ को बराबरीमा सकिएको छ । अब नेपाल र जिम्बावे ए बीच तीन एकदिवसिय अभ्यास खेल हुनेछ ।
