एजेन्सी । युरोपा लिग फुटबल अन्तर्गत बार्सिलोना र म्यान्चेस्टर युनाइटेडले बराबरी खेलेका छन् ।
बिहीबार राति भएको पहिलो लेगको खेलमा स्पेनिस क्लब बार्सिलोना र इंग्लिस क्लब युनाइटेडले २–२ गोलको बराबरी खेलेका हुन् ।
खेलको ५० औं मिनेटमा मार्कस एलोन्सोले गोल गर्दै घरेलु टोली बार्सिलोनालाई सुरुवाती अग्रता दिलाएका थिए । तर, त्यसको दुई मिनेटपछि अर्थात् ५२ औं मिनेटमा मार्कुस रासफोर्डले गोल गर्दै युनाइटेडलाई १–१ को बराबरीमा ल्याए ।
५९ औं मिनेटमा बार्सिलोनाका कोउन्डेले आत्मघाती गोल गरेपछि युनाइटेडले खेलमा १–२ को अग्रता बनायो । तर, ७६ औं मिनेटमा राफिन्हाले गोल गर्दै बार्सिलोनाको हार टारे ।
अब यी दुई टोलीबीच दोस्रो लेग फेब्रुअरी २४ मा युनाइटेडको घरेलु मैदानमा हुनेछ ।
