एजेन्सी । युरोपा लिग फुटबल अन्तर्गत सेमिफाइनलको पहिलो लेगमा इटालियन क्लब एएस रोमाले जित निकालेको छ । गएराति भएको खेलमा रोमाले जर्मन क्लब लेभरकुसेनलाई १–० गोलले पराजित गरेको हो ।
घरेलु मैदानमा रोमालाई जित दिलाउन खेलको ६२ औं मिनेटमा एडोर्डो वोभेले गोल गरे । योसँगै रोमाले लेभरकुसेनविरुद्ध १–० को अग्रता बनाएको छ ।
यस्तै, गएराति नै भएको अर्को खेलमा इटालियन क्लब युभेन्ट्स र स्पेनिस क्लब सेभियाले १–१ गोलको बराबरी खेलेका छन् । सेमिफाइनलकै पहिलो लेग अन्तर्गत युभेन्ट्सको घरेलु मैदानमा भएको खेलमा २६ औं मिनेटमा पाहुना टोली सेभियाका युसेफ एन नेसीरीले गोल गर्दै सुरुवाती अग्रता बनाएका थिए । तर, अन्तिम समयमा अर्थात् ९०+७ मिनेटमा फेडेरिको गाट्टीले गोल गर्दै युभेन्ट्सलाई हारबाट जोगाए ।
अब यी टिमहरुले दोस्रो लेगका लागि मे १९ मा प्रतिस्पर्धा गर्नेछन् ।
