काठमाडौं । सहिद स्मारक ‘ए’ डिभिजन लिगअन्तर्गत मच्छिन्द्र फुटबल क्लब र फ्रेन्ड्स क्लबबीचको खेल २-२ को बराबरीम सकिएको छ ।
त्रिपुरेश्वरस्थित दशरथ रंगशालामा बिहीबार भएको खेल बराबरीमा रोकिएपछि मच्छिन्द्र र फ्रेन्ड्सले अंक बाडेका छन् ।
प्रतिस्पर्धात्मक खेलमा दुबै टोलीले दोस्रो हाफमा गोल गरेका थिए । खेलको ६८ औं मिनेटमा प्रकाश बुढाथोकीले गोल गर्दै फ्रेन्ड्सलाई सुरुआती अग्रता दिलाएका थिए ।
तर, खेलको ७१ औं मिनेटमा आफिज ओलावालेले गोल गर्दै मछिन्द्रलाई १-१ गोलको बराबरीमा ल्याए ।
खेलको ७८ औं मिनेटमा राफिक अमिनुले गोल गर्दै फ्रेन्ड्सलाई २-१ को अग्रता दिलाए । त्यसपछि खेलको ८३ औं मिनेटमा ओलावालेले व्यक्तिगत दोस्रो गोल गर्दै मछिन्द्रलाई २(२ गोलको बराबरीमा ल्याए ।
यस बराबरीसँगै मछिन्द्रले १९ खेलमा ३१ अंक जोडेको छ भने फ्रेन्ड्सले १९ खेलमा २१ अंक जोडेको छ । अंकतालिकामा मछिन्द्र तेस्रो स्थानमा रहँदा फ्रेन्ड्स १२ औं स्थानमा छ ।
यस्तै च्यासल मैदानमा भएको मनाङ मर्स्याङ्दी र संकटाबीचको खेल पनि २-२ को बराबरीमा टुंगिएको छ । कोफी कोउडुको दुई गोलमा दुई पटक अग्रता लिएपनि संकटाका युसुफ अत्रिस र मनिष डाँगीले बराबरी गोल फर्काए ।
