काठमाडौं । साफ च्याम्पियनसिप अन्तर्गत पहिलो खेल खेल्न लागेको नेपाली राष्ट्रिय फुटबल टिमको सुरुवाती–११ सार्वजनिक गरिएको छ ।
नेपाली टिमका मुख्य प्रशिक्षक भिन्सेन्जो अल्बर्टो एनेसले कुवेतविरुद्धको खेलका लागि किरण चेम्जोङको कप्तानीमा पहिलो रोजाइ सार्वजनिक गरेका हुन् ।
नेपालले च्याम्पियनसिपको उद्घाटन खेलमा आमन्त्रित टिमका रूपमा सहभागिता जनाउन लागेको कुवेतविरुद्ध भिड्दैछ । भारतको बेंगलुरुस्थित श्री कान्तिरभा रंगशालामा हुने खेल नेपाली समयानुसार दिउँसो ३ः४५ बजे सुरु हुनेछ ।
समूह ‘ए’मा रहेको नेपालले २४ जुन आयोजक तथा डिफेन्डिङ च्याम्पियन भारत र २७ जुनमा पाकिस्तानसँग खेल्नेछ ।
नेपालको समूहमा भारत, कुवेत र पाकिस्तान रहेका छन् । त्यस्तै समूह ‘बी’मा लेवनान, बंगलादेश, माल्दिभ्स र भुटान रहेका छन् । प्रत्येक समूहको शिर्ष दुई टोली सेमिफाइनलमा प्रवेश गर्नेछन् । फाइनल खेल ४ जुलाईमा हुनेछ ।
नेपाली टिम:
किरण चेम्जोङ (कप्तान तथा गोलकिपर), सनिस श्रेष्ठ, अनन्त तामाङ, रोहित चन्द, विमल पाण्डे, एरिक विष्ट, पुजन उपरकोटी, लाकेन लिम्बू, अन्जन विष्ट, नवयुग श्रेष्ठ र मनीष डाँगी ।
