काठमाडौं । प्रधानमन्त्री कप क्रिकेटमा सन्दीप जोराको शतकमा नेपाल एपीएफ क्लबले बागमती प्रदेशलाई २ सय ४२ रनको बलियो लक्ष्य दिएको छ ।
आइतबार त्रिवि क्रिकेट मैदानमा टस हारेर ब्याटिङको निम्तो पाएको एपीएफले निर्धारित ५० ओभरमा ९ विकेट गुमाएर २ सय ४१ रन बनाायो ।
एपीएफको लागि मध्यक्रमका ब्याटर सन्दीप जोराले शानदार शतक बनाए । उनले १०३ बलमा ५ छक्का र ६ चौका प्रहार गर्दै १०१ रन बनाए । एक समय ४१-५ को अवस्थामा पुगेको एपीएफलाई उनले उद्दार गरेका थिए । क्रिजमा पाँचौ नम्बरका आएका सन्दीपले लोकेश बमसँग ६१ रनको अर्धशतकीय साझेदारी गर्दै एपीएफलाई १०७ सम्म पुर्याएका थिए ।
त्यस्तै, उनले आठौँ विकेटका लागि अमर रौतेलासँग ६८ र नवौँ विकेटका लागि अविनाश बोहरासँग ४२ रनको साझेदारी गरेका थिए। यसवर्षको प्रधानमन्त्री कपमा शतक बनाउने सन्दीप दोस्रो खेलाडी हुन् । शनिबार नेपाल पुलिसका रसिद खानले पनि शतक बनाएका थिए ।
एपीएफको लागि कप्तान रोहित पौडेलले २ र आसिफले १५ रन जोडे । सुमित महर्जनले ६ रन बनाउदा ओपनर प्रज्वल शाहीले १० रन बनाएर आउट भए । अमर २२ रन बनाए भने अभिनाश बोहोरा १८ रन बनाउदै नटआउट रहे ।
बलिङतर्फ बागमतीका सूर्य तामाङले तीन विकेट लिए भने प्रतिश जिसी, सोनु देवकोटा र रिजन ढकालले समान एक–एक विकेट लिए ।
