काठमाडौं । प्रधानमन्त्री कप एकदिवसीय राष्ट्रिय प्रतियोगितामा बागमती प्रदेशले कोशी प्रदेशलाई ६४ रनले हराएको छ । यससँगै बागमतीले लगातार तेस्रो जित दर्ता गरेको छ भने कोशीले लगातार पाँचौ हार बेहोरेको छ ।
बागमतीले दिएको २ सय ७४ रनको लक्ष्य पछ्याएको कोशी ४७.१ ओभरमा ओभरमा २ सय ९ रन बनाएर अलआउट भयो । कोशीका लागि सुजन थपलिया र कप्तान अंकित सुवेदीले अर्धशतक प्रहार गरे । सुजनले ५९ रन जोडे र अंकितले ५३ रन बनाए । आइश भट्टराई ३२, सोनु अन्सारी २१, फिर्दोस अन्सारी ५, सुभान गहतराज ४ र हेमन्त राईले १० रन बनाए ।
यता बागमतीका लागि इशान पाण्डेले सर्वाधिक ५ विकेट लिए । सूर्यले २ विकेट लिदाँ प्रतिकले एक १ विकेट लिए ।
त्यसअघि टियु क्रिकेट मैदानमा टस हारेर ब्याटिङको निम्तो पाएको बागमतीले ४८.३ ओभरमा अलआउट हुँदै २ सय ७३ रन बनाएको थियो ।
बागमतीको लागि आक्रामक ब्याटिङ गर्दै आशुतोष घिरैयाले शतकिय ईनिङ खेलेका थिए । आशुतोषले १ सय ११ बलमा १६ चौका र २ छक्का प्रहार गर्दै १ सय १८ रन जोडे । यससँगै आशुतोष बागमती प्रदेशबाट शतक प्रहार गर्ने दोस्रो खेलाडी बने। यसअघि ज्ञानेन्द्र मल्लले २०१९ संस्करणमा शतक प्रहार गरेका थिए । उनको करीयरको भने यो पहिलो शतक हो ।
बागमतीका लागि विकेटकिपर रविन जोशीले ४३ र रितले ४९ रन बनाए । कोशीका लागि अभ्यास तिम्सिनाले ३ विकेट लिए । कमल खत्री र हेमन्त राईले २९२ तथा फिर्दोश अन्सारीले १ विकेट लिए ।
यस जितसँगै बागमती अंक तालिकाको दोस्रो स्थानमा उक्लिएको छ । ५ खेलमा बागमतीको ३ जित र २ हारसँगै ६ अंक छ । सुदूरपश्चिम ३ खेलमा शत प्रतिशत जितका साथ ६ अंक जोड्दै शीर्षस्थानमा छ । कोशी ५ खेलमा बिना कुनै अंक पुछारमा छ । गण्डकीले पनि ३ खेलमा कुनै अंक जोडेको छैन ।
