काठमाडौँ । प्रधानमन्त्री कप एकदिवसीय पुरुष राष्ट्रिय क्रिकेट प्रतियोगितामा मधेश प्रदेशले सुदुरपश्चिम प्रदेशलाई ८० रनले हराएको छ ।
३ सय २० रनको विशाल लक्ष्य पछ्याएको सुदुरपश्चिम ४४.५ ओभरमा २ सय ३९ रन बनाएर अलआउट भयो । तेस्रो नम्बरमा आएका नरेन भट्टले शतकिय इनिङ खेलेपनि टीमले जित निकाल्न सकेन । उनले १२२ बलमा १३ चौका र १ छक्का प्रहार गर्दै १२१ रन बनाए । उनले १०८ बलमा शतक पुरा गरेका थिए ।
यस्तै, नारायण जोशीले २६, किरण ठगुन्नाले २०, नरेन साउदले १८, खड्क बोहरा १४, गजेन्द्र बोहराले १२ रन बनाए । मधेशका लागि राजेश यादव र प्रदिप पासवानले समान तीन विकेट लिए । रंजित कुमारले दुई विकेट लिंदा हरिशंकर शाह र पवन सर्राफले समान एक(एक विकेट लिए ।
त्यसअघि कीर्तिपुरस्थित अन्तर्राष्ट्रिय क्रिकेट मैदानमा टस जितेर पहिला ब्याटिङ रोजेको मधेश प्रदेशले निर्धारित ५० ओभरमा नौ विकेट गुमाएर तीन सय १९ रन बनायो ।
तेस्रो नम्बरमा क्रिज समाल्न आएका मयान यादबले एक सय १५ रनको शानदार शतकिय ईनिङ खेले । उनले एक सय २८ बलमा दुई छक्का र आठ चौका हिर्काए । ओपनर अनिल शाहले ६९ र पवन सर्राफले ७० रन बनाए । यस्तै, रुपेश सिंहले २१, अभिषेक तिवारीले १६ , हरिशंकर शाहले १४ रन थपे ।
सुदूरपश्चिम प्रदेशका बलर शेर मल्लले सर्वाधिक चार विकेट लिए । विकाश अग्रीले दुई तथा नारायण जोशी र गजेन्द्र बोहराले एक–एक विकेट लिए ।
सुदूर ४ खेलमा ३ मा जित र १ मा हारसहित ६ अंकका साथ चौथो स्थानमा छ । मधेश ६ खेलमा ४ मा जित र २ मा हारसहित ८ अंकका साथ नेटरनरेटका कारण तेस्रो स्थानमा छ । पुलिस ४ खेलमा अपराजित रहँदै शीर्षस्थानमा छ । बागमती ६ खेलमा ४ मा जित र २ मा हारसहित ८ अंकका साथ दोस्रो स्थानमा छ ।
