काठमाडाैंः चिनियाँ कम्युनिस्ट पार्टी (सीपीसी) का अन्तर्राष्ट्रिय विभाग उपप्रमुख गुओ यैचौ नेतृत्वको चार सदस्यीय टोली आइतबार काठमाडौं उत्रिए लगत्तै भेटघाटमा व्यस्त छ । सीपीसीका प्रभावशाली मानिने गुओ यैचौले टोली चार्टर विमानबाट काठमाडौं उत्रँदा सत्तारुढ दल भित्रको किचलो सडकमा छताछुल्ल भै पोखिएको छ । एक महिनाअघि चिनियाँ रक्षामन्त्री वेई फेङ्गेले नेपाल भ्रमण गर्दा सत्तारुढ दलका नेताहरु एकै ठाउँमा थिए, तर यतिबेला दल विभाजन झैं भएर परस्पर गालीगलाैजमा उत्रिएका छन् । र यसकाे असर स्थानीय पार्टी कमिटीसम्मै पुगिसकेकाे छ ।
नेकपा भित्र पटक पटक समस्या देखिँदा नेपालस्थित चिनियाँ राजदुत हाउ यान्छी सक्रिय भए पनि यस पटक भने उनको प्रयास पनि सफल हुन सकेन । पटक पटक चीनले नेकपा विभाजन नहोस् भन्ने सन्देश विभिन्न च्यानलहरु मार्फत शीर्ष नेताहरु समक्ष पुर्याउँदै आएको भएपनि त्यस सन्देशले काम नगरेपछि राष्ट्रपति सी चिङ फिङको विश्वासपात्रका रुपमा चिनियाँ कम्युनिस्ट पार्टी (सीपीसी) का अन्तर्राष्ट्रिय विभाग उपप्रमुख गुओ यैचौ नेतृत्वको टोली काठमाडौं आइपुगेको हो ।
टोलीले आइतबार राजदुत यान्छीसँग दुतावासमा पछिल्लो अवस्थाको बिफ्रिङ लिएपछि साँझ नै राष्ट्रपति विद्यादेवी भण्डारीसँग भेट गरेको थियाे । राष्ट्रपति बन्नुभन्दा अघि नेकपा एमालेका उपाध्यक्ष समेत रहनु भएकी राष्ट्रपति भण्डारीले पार्टी एकताका लागि विवादकाबीच पनि शीतलनिवासबाट सक्रियता देखाउनु भएको थियो । तर त्यो प्रयासले यस पटक काम गरेन । राष्ट्रपतिलाई भेटेलगत्तै चिनियाँ टोलीले प्रधानमन्त्री केपी ओलीलाई बाालुवाटारमा, नेकपा नेपाल– दाहाल समूहका अध्यक्ष पुष्पकमल दाहाललाई खुमलटारमा र अध्यक्ष माधव नेपाललाई बानेश्वरस्थित होटल एभरेष्टमा भेट गरेको छ । टोलीले पूर्व माओवादीका नेता एवं हाल जनता समाजवादी पार्टीका संयोजक डा बाबुराम भट्टराईसँग पनि भेटवार्ता गरेको छ ।
नेकपा बाहेकका अन्य नेतासँग चीन नेपाल सम्बन्धका बारेमा कुराकानी भए पनि नेकपाका नेताहरुलाई पार्टी किन विभाजनकाे तहसम्म पुग्यो ? अब फेरि एकता सम्भव छ कि छैन जस्ता विषयमा छलफल भएको स्राेतले जनाएको छ । चीनले विवादलाई अघि नबढाउन सुझाव दिँदै सकेसम्म एकता गर्न, नभए निर्वाचन लगायत विषयमा सहकार्य गरेर अघि बढ्न सुझाव दिएको भेटमा सहभागी एक नेताले बताएका छन् ।
चार दिने नेपाल बसाई पछि चीन फर्के लगत्तै टोलीले चिनियाँ राष्ट्रपतिलाई नेपालको पछिल्लो अवस्थाका बारेमा बिफ्रिङ गर्नेछ । टोली फर्के पछि नेकपा भित्रको कलह, विभाजन र शीर्ष नेताहरुबीचको बैमनस्यताको बाटो केही परिवर्तन हुन सक्ने अनुमान नेताहरूले गरेका छन् ।
