काठमाडौँ । मंगलबारको संवैधानिक परिषद्को बैठकमा सभामुख अग्निप्रसाद सापकोटा उपस्थित नहुने भएका छन् । प्रधानमन्त्री केपी शर्मा ओलीले आजै बिहान बालुवाटारमा संवैधानिक परिषदको बैठक बोलाउनुभएको हो । बैठक विभिन्न संवैधानिक आयोगमा नियुक्ति सिफारिसका बारेमा छलफलका लागि बस्न लागेको हो ।
सभामुख सापकोटाले भने परिषद् बैठकका लागि आवश्यक गृहकार्य र सल्लाह नगरेको भन्दै सहभागी नहुने बताउनुभएको हो । 'परिषद्को बैठकका लागि आवश्यक समन्वयको अभाव भयो । पूर्वतयारी पुगेन र गृहकार्य पनि गरिएन भनेर सभामुख नजानुहुने भएको छ,' सभामुखको सचिवालय स्रोतले भन्यो । बैठकमा विपक्षी दल काँग्रेसका सभापति शेरबहादुर देउवा भने उपस्थित हुनुहुन्छ ।
अख्तियार दुरुपयोग अनुसन्धान आयोग, मानवअधिकार आयोगलगायत विभिन्न संवैधानिक आयोगमा ४५ सिटमा नियुक्तिका लागि परिषद्को बैठक बस्न लागेको हो । यसअघि आइतबार बोलाइएको बैठकमा पनि सभामुख सापकोटा जानुभएको थिएन। बैठकले बैधता पाउनका लागि अध्यक्षबाहेक ४ जनाको उपस्थिति अनिवार्य मानिन्छ । परिषदमा एकजना सदस्य (उपसभामुख) पद रिक्त छ ।
