काठमाडौं । राष्ट्रिय मानव अधिकार आयोगले हालै देशमा भएका घटनाक्रमप्रति ध्यानाकर्षण गर्दै, शान्ति, सुरक्षा र मानव अधिकारको संरक्षणमा पर्ने प्रतिकूल प्रभावका बारेमा सचेत गराएको छ।
आयोगले कानूनको कार्यान्वयनमा पूर्वाग्रह, दुरासयका साथ पक्राउ गर्ने र पक्राउ गरिएका व्यक्तिप्रति मानवोचित व्यवहारको कमी जस्ता सूचनाहरू प्राप्त गरेको जनाएको छ।
आयोगका अनुसार, हालका घटनाहरूले नागरिकका मानव अधिकार र शान्ति सुरक्षामा नकारात्मक प्रभाव पारिरहेका छन्। यस सन्दर्भमा, आयोगले निष्पक्ष र स्वतन्त्र अनुसन्धानको आवश्यकता जोड दिँदै, फौजदारी मुद्दामा पूर्वाग्रहपूर्ण व्यवहार नगर्न र अनुसन्धानमा सहयोग गर्न सबै पक्षलाई आग्रह गरेको छ।
“फौजदारी कसूरमा निष्पक्ष र प्रभावकारी अनुसन्धान हुन सकेमा मात्र मानव अधिकार र कानूनी शासनको स्थापना सम्भव छ,” आयोगले एक वक्तव्यमा भनेको छ।
आयोगले अपराधका घटनामा दखल नदिने र नियन्त्रणमा लिएका अभियुक्तहरूको स्वास्थ्य उपचारमा भेदभाव नगर्न सिफारिस गरेको छ। यसका साथै, घृणायुक्त अभिव्यक्तिहरूको प्रयोग नगरी कानूनको सम्मान गर्दै अनुसन्धान प्रक्रियामा सहयोग गर्न आग्रह गरिएको छ।
