काठमाडौं । नायिका पूजा शर्मा र संचारकर्मी प्रकाश सुवेदीबीचको विवाद सहमतिमा टुंगिएको छ । रंग पत्रकार सुवेदीले एक टेलिभिजन कार्यक्रममा नायिका शर्मा प्रति लक्षित गर्दै अशिष्ट भाषाको प्रयोग गरेपछि विवाद उत्पन्न भएको थियो ।
सुवेदीको शैली प्रति असहमति जनाउँदै चलचित्रसंग सम्बन्धित ७ वटा संस्थाले आपत्ति जनाउँदै कारबाहीको माग गरेका थिए भने नायिका शर्माले प्रेस काउन्सिल लगायत विभिन्न संस्थामा उजुरी दिनुभएको थियो । यता सुवेदीले कार्यक्रम मार्फत नै पटक पटक माफी मागेका थिए । एउटै क्षेत्रमा कार्यरत दुई व्यक्ति बीचको द्वन्द्वले यस क्षेत्रमा नै असर पर्ने भन्दै सहमतिका लागि प्रयास भएको थियो ।
चलचित्र कलाकार संघ, चलचित्र निर्माता संघका अध्यक्षहरुको रोहबरमा बिहीबार पूजा र प्रकाशबीच सहमति भएको हो ।
सहमति अनुसार प्रकाशले संचालन गर्दै आएको कार्यक्रममा पेशागत मर्यादामा रहेर प्रचलित कानुन र पेशागत आचारसंहिताको परिपालनातर्फ सजग रही भविष्यमा आपसी सद्भाव विग्रन नदिने प्रवृत्तिमा दुबै पक्ष संवेदनशील र र सचेत रहने कुरा उल्लेख छ ।
