काठमाडौँ । प्रधानमन्त्री केपी शर्मा ओलीले कोरोना भाइरस समुदायमा फैलिन सक्ने खतरा बढेको बताएका छन् ।
बुधबार कोभिड- १९ संंकट व्यवस्थापन केन्द्र (सिसिएमसी) मा रहेका मन्त्रीसँग छलफल गर्दै प्रधानमन्त्रीले सो कुरा बताएका हुन् ।
उनले अब संकट समुदायस्तरमै पुग्न सक्ने देखिएकोले यसको शीघ्र व्यवस्थापन जरुरी रहेको बताए । उनले व्यवस्थापनका लागि आफ्ना तर्फबाट योजना ल्याउन समेत मन्त्रीहरूलाई निर्देशन दिएको बताइएको छ ।
‘संकट धेरै नै गहिरिँदै गएकोले यो महामारी अब समुदायमा पनि पनि फैलिने सम्भावना देखिएको प्रधानमन्त्रीले बताएको एक मन्त्रीले जानकारी दिए ।
सो बैठकमा प्रधानमन्त्रीले भने- 'कोरोना भइरसको नियन्त्रणका लागि तपाईंहरूले पनि आफूले सोचेको योजना लिएर आउनुस्।’
बिहीबार बस्ने मन्त्रिपरिषद बैठकले थप निर्णय गर्ने बताइएको छ । बिहीबार मन्त्रिपरिषदको बैठकको समय तय भएको त छैन तर कारोना रोकथामको रणनीतिबारे छलफल गर्नका लागि सो बैठक बस्ने बताइएको छ ।
