काठमाडौँ । गएको हप्तादिन भन्दा लामो समयदेखि सत्तारुढ नेपाल कम्युनिष्ट पार्टी (नेकपा) भित्र चलेको शक्ति संघर्षका कारण पार्टी नै फुटको संघारमा पुगेको चर्चा चलिरहेका बेला चिनियाँ राजदूत हाउ यान्छीको सक्रियता झन् बढ्दै गएको देखिएको छ ।
राजदूत यान्छीले आज बिहान अध्यक्ष प्रचण्डको निवासमै पुगेर भेट गरेको खुमलटार समाचार स्रोतले जनाएको छ । भेटवार्ताका क्रमम के कुराकानी भयो भन्ने विषयमा औपचारिक रुपमा बाहिर आएको त छैन तर पनि उनले हाल नेकपालमा देखिएको शक्ति संघर्षका बारेमा सहजीकरण गर्ने बारेमा कुराकानी भएको स्रोतले बतायो ।
उनले नेकपाका शीर्ष नेताहरुसँगको भेटघाटलाई तीब्रता दिएकी छिन् । होउले मंगलबार बिहान नेकपाका बरिष्ठ झलनाथ खनाललाई उनकै निवास डल्लु पुगेर भेटवार्ता गरेकी थिइन् । उक्त भेटवार्ता करिब ४५ मिनट भएको बताइएको छ । कुराकानीमा आपसी हीतका बारेमा सामान्य छलफल भएको बताइएको थियो ।
नेकपा फुटको संघारमा पुगेको चर्चा चलिरहेको बेला चिनियाँ राजदूतको यो भेटलाई अर्थपूर्ण मानिएको छ । चिनियाँ राजदूत होउले अघिल्लो आइतबार साँझ नेकपाको बिदेश विभाग प्रमुख समेत रहेका माधव कुमार नेपालसँग पनि भेटघाट गरेकी थिइन् ।
यसअघि पनि गएको तीन महिनाअघि नेकपामा यसरी नै विवाद हुँदा राजदूत हाउले वैशाख १९ गते प्रचण्ड र नेपालसँग निवास मै पुगेर छुट्टा–छुट्टै भेटवार्ता गरेकी थिइन् । त्यसपछि नेकपालमा आएको तनावको व्यवस्थापन भएको थियो ।
