काठमाडौं: नेपाल प्रहरीको काठमाडौं उपत्यका अपराध अनुसन्धान कार्यालयले बैदेशिक रोजगारीका लागि विभिन्न देश पठाइदिन्छु भनी ठगीमा संलग्न पाँच जनालाई पक्राउ गरेको छ ।
उक्त कार्यालयका सूचना अधिकारी एसपी काजी कुमार आचार्यका अनुसार, पीडितहरुले दिएको जाहेरी दरखास्तका आधारमा ती व्यक्तिहरु पक्राउ परेका हुन् ।
आचार्यका अनुसार, ताप्लेजुङको सिरिजङ्घा गाउँपालिका–१ स्थायी घर भएकी साहारा सुब्बा (थेबे) ले कोरिया पठाइदिन्छु भन्दै ९ जनासँग एक करोड आठ लाख ३० हजार लिएर फरार भएकी थिइन् । थेबेलाई प्रहरी टोलीले ललितपुर हरिसिद्धिबाट यही भदौ ४ गते पक्राउ गरेको थियो ।
यस्तै, अर्का पक्राउ पर्नेमा प्युठान घर भएका शान्त बहादुर बि.क. ले एक व्यक्तिलाई क्यानडा पठाइ दिन्छु भन्दै छ लाख ठगी गरेका थिए । त्यस्तै, कतार पठाइदिन्छु भन्दै एक व्यक्तिसँग तीन लाख रुपैयाँ लिएर फरार रहेका सिरहाको कर्जन्हा स्थायी घर भएका महमद हातिम पनि पक्राउ परेका छन् ।
प्रहरी टोलीले तीन जना व्यक्तिलाई कतार पठाइदिने भन्दै सात लाख रुपैयाँ लिएर फरार अभियुक्त काभ्रेको भुम्लु स्थायी घर भएका प्रल्हाद खत्री तथा दक्षिण अफ्रिका पठाइदिन्छु भनी एक व्यक्तिसँग पाँच लाख १७ हजार लिएर फरार खोटाङ स्थायी घर भएकी तारा बस्नेत तामाङलाई पनि प्रहरीले पक्राउ गरेको छ ।
उनीहरु सबैलाई थप अनुसन्धान र कारबाहीका लागि बैदेशिक रोजगार विभाग, ताहाचल पठाइएको पनि प्रहरीले जनाएको छ ।
