अमेरिकी राष्ट्रपति डोनाल्ड ट्रम्पले इरानसँग व्यापारिक सम्बन्ध कायम राख्ने कुनैपनि मुलुकले अमेरिकासँगको व्यापारमा २५ प्रतिशत भन्सार शुल्क तिर्नुपर्ने घोषणा गर्नुभएको छ । अहिले इरानसँग व्यापारिक साझेदारी गर्ने प्रमुख राष्ट्रहरूमा चीन, भारत, रूस, टर्की लगायत रहेका छन् ।
सोमवार आफ्नो सामाजिक सञ्जाल ट्रुथ सोसलमार्फत यस निर्णयको सार्वजनिक गर्दै ट्रम्पले यो आदेश तत्काल प्रभावकारी हुने र यो नै अन्तिम तथा निर्णायक कदम भएको बताउनु भयो ।
इरानमाथि वासिङ्टनको आर्थिक दबाब बढाउने शृङ्खलाको यो पछिल्लो कडी हो । ट्रम्पले आफ्नो प्रशासनले इरानविरुद्ध सैन्य कारबाहीसहितका अत्यन्तै कडा विकल्पहरू माथि विचार गरिरहेको भन्दै बारम्बार चेतावनी दिँदै आउनुभएको छ ।
यो नयाँ घोषणाले इरानसँग आर्थिक कारोबार गरिरहेका विश्वका अन्य मुलुकहरूलाई समेत दबाबमा पारेको छ ।
