काठमाडौँ । न्युजिल्यान्डले भारतलाई दोस्रो एकदिवसीय (वनडे) खेलमा ७ विकेटले पराजित गर्दै ३ खेलको शृंखला १–१ को बराबरीमा ल्याएको छ।
बुधबार राजकोटमा भएको खेलमा भारतले २८४ रन बनाएको थियो। डेरिल मिचेलको शतकको मद्दतमा न्युजिल्यान्डले उक्त लक्ष्य सहजै पूरा गर्यो।
विराट कोहलीले २३ रन मात्र बनाए पनि उनी न्युजिल्यान्डविरुद्ध सबैभन्दा धेरै वनडे रन बनाउने भारतीय बनेका छन्। रोहित शर्माले एसियामा ७ हजार वनडे रन पूरा गरे। यसैबीच, प्रसिद्ध कृष्णाले डेरिल मिचेलको सजिलो क्याच छोडे।
सचिनलाई पछि पारे विराटले
विराट कोहलीले २३ रनको इनिङ्समा पहिलो रन बनाउने बित्तिकै सचिन तेन्दुलकरको कीर्तिमान तोडे। उनी न्युजिल्यान्डविरुद्ध वनडेमा सबैभन्दा धेरै रन बनाउने भारतीय बनेका हुन्। सचिनले १७५० रन बनाएका थिए भने विराटको नाममा अब १७७३ रन पुगेको छ। समग्रमा हेर्दा, अस्ट्रेलियाका रिकी पोन्टिङ न्युजिल्यान्डविरुद्ध ५० इनिङ्समा १९७१ रन बनाउँदै शीर्ष स्कोरर छन्।
वर्ल्ड कप फाइनलजस्तै आउट भए कोहली
विराट कोहली २९ बलमा २३ रन बनाएर आउट भए। क्रिस्टियन क्लार्कले गुड लेन्थमा फालेको इनस्विङरमा कोहली थर्ड म्यानतर्फ सिंगल लिन खोज्दा बल ब्याटको भित्री किनार लागेर सिधै स्टम्पमा ठोक्कियो। कोहली २०२३ को एकदिवसीय विश्वकप फाइनलमा अस्ट्रेलियाविरुद्ध पनि यस्तै तरिकाले आउट भएका थिए। त्यतिबेला उनी अर्धशतक बनाएपछि पभेलियन फर्किएका थिए र भारतले त्यो खेल हार्नु परेको थियो।
