भक्तपुर। क्षयरोगका बिरामीलाई अन्तरङ्ग सेवा सञ्चालन गर्ने लक्ष्यका साथ १०० शय्याको अस्पताल भवन निर्माण भए पनि सेवा सञ्चालनमा ल्याउन नसकिएका विषयमा आज यहाँ बृहत् छलफल गरिएको छ ।
सो छलफलका क्रममा बागमती प्रदेशका स्वास्थ्यमन्त्री किरण थापा मगरले सो सम्बन्धमा सङ्घीय सरकारसँग पनि समन्वय तथा पहल गर्ने बताउनुभयो ।
मध्यपुरथिमिस्थित राष्ट्रिय क्षयरोग नियन्त्रण केन्द्रको आज अनुगमन तथा निरीक्षण गर्दै उहाँले चार वर्ष अगाडि नै अस्पताल सञ्चालनका लागि भवन निर्माण सम्पन्न भएपनि सेवा सञ्चालन हुन नसक्नु दुःखद् भएको बताउनुभयो ।
राष्ट्रिय क्षयरोग केन्द्रका कार्यकारी निर्देशक डा भुवन पौडेलसहितको उपस्थितिमा भएको छलफलमा मन्त्री मगरले अस्पतालले तत्काल अन्तरङ्ग सेवा सञ्चालन गरी क्षयरोगका बिरामीलाई अस्पतालमै भर्ना गरेर उपचारको व्यवस्था गर्नुपर्ने धारणा राख्नुभयो ।
उहाँले भन्नुभयो, “क्षयरोग केन्द्रमा यति भव्य, राम्रो भवन बनेको छ, यो भवन निर्माणका लागि बजेट व्यबस्थापन गर्न हामीले धेरै पहल ग¥यौँ, १०० शय्याको अस्पताल सञ्चालन गर्नकै लागि भवन बन्यो तर सेवा सञ्चालन नहुँदा एकातिर बिरामीले उपचार पाउन सकेनन्, अर्कोतर्फ भवन अलपत्रजस्तो हुन पुग्यो । म सेवा सञ्चालनमा ल्याउन तत्काल सङ्घीय स्वास्थ्य मन्त्रीसँग छलफल गर्नेछु ।”
केन्द्रका कार्यकारी निर्देशक पौडेलले केन्द्रको अवस्था, सेवा प्रवाहलगायत देशभर सञ्चालनमा रहेको क्षयरोग नियन्त्रणका प्रयासहरुका बारेमा जानकारी गराउनुभएको थियो । रासस
