इङल्यान्डको लोकप्रिय फुटबल प्रतियोगिता कारबाओ कपमा म्यान्चेस्टर सिटी र आर्सनल फाइनलमा प्रवेश गरेका छन् । अब कारबाओ कपको फाइनल खेल मार्च २२, २०२६ मा वेम्बली रंगशालामा हुनेछ ।
गएराति भएको खेलमा म्यान्चेस्टर सिटीले दोस्रो लेगमा न्यूक्यासल युनाइटेडलाई ३–१ गोल अन्तरले पराजित गरी फाइनलमा प्रवेश गरेको हो । समग्रमा सिटीले न्यूक्यासललाई ५–१ ले पराजित गरेको छ । पहिलो लेगमा पनि सिटीले २–० गोल अन्तरले न्यूक्यासललाई हराएको थियो ।
सिटीको गृह मैदान एतिहाद रंगशालामा भएको गएरातिको खेलमा सिटीका लागि ७ र २९ मिनेटमा ओमार मारमाउसले दुई गोल गरेका थिए भने ३२औं मिनेटमा टिजानी राइन्डर्सले एक गोल गरेका थिए ।
पहिलो हाफमै तीन गोल गरेर खेलमा प्रभाव जमाएको सिटीका विरुद्ध न्यूक्यासलका लागि एक मात्र गोल एन्थोनी एलान्गाले ६२औं मिनेटमा गरेका थिए, तर त्यो पर्याप्त थिएन ।
यस्तै, अघिल्लो रात भएको दोस्रो लेगको खेलमा आर्सनलले चेल्सीलाई १–० गोल अन्तरले पराजित गरी समग्रमा ४–२ ले विजयी हुँदै फाइनलमा प्रवेश गरेको थियो ।
