काठमाडौं । टी–२० विश्वकप अन्तर्गत समूह ‘बी’को खेलमा घरेलु टोलि श्रीलंकाले ओमानलाई १०५ रनले हराएको छ । यो श्रीलंकाको लगातार दोस्रो जित हो । यसअघि श्रीलंकाले आयरल्यान्डलाई २० रनले पराजित गरेको थियो ।
श्रीलंकाले दिएको २२६ रनको विशाल लक्ष्य पछ्याएको ओमानले निर्धारित २० ओभरमा ९ विकेट गुमाएर १२० रन मात्रै बनायो । ओमानका लागि मोहम्मद नदीमले सर्वाधिक ४९ रन बनाए । यस्तै, वसीम अलीले २७ रन बनाउँदा अन्य ब्याट्सम्यानले दोहोरो अंकमा रन बनाउन सकेनन् ।
बलिङतरफ श्रीलंकाका दुश्मन्था चमीरा र मथिसा तीक्षणाले दुई–दुई विकेट लिए । दुनिथ वेल्लालागे, दुशन हेमन्था र कामिन्दु मेन्डिसले एक–एक विकेट लिए ।
त्यसअघि पल्लेकेले मैदानमा टस हारेर पहिले ब्याटिङको निम्तो पाएको श्रीलंकाले २० ओभरमा ५ विकेटको क्षतिमा २२५ रन बनाएको थियो । श्रीलंकाका तीन खेलाडीले अर्धशतक बनाएबा थिए । कुशल मेन्डिसले ६१, पवन रत्नायकेले ६० तथा दाशुन शनाकाले ५० रन जोडे । यस्तै, कमिन्दु मेन्डिस १९ रनमा अविजित रहँदा पथुम निसान्काले १३ रन जोडे ।
बलिङतर्फ ओमानका जितेन रमानन्दीले दुई तथा सुफ्यान मेहमुद र जय ओडेराले एक–एक विकेट लिए ।
