काठमाडौं: अमेरिकाको भर्जिनिया राज्यस्थित फेयरफ्याक्स काउन्टीमा करिब ५० वर्षीय एक नेपालीले आफ्नै छोरी र पत्नीको हत्या गरेका छन् ।
स्थानीय प्रहरीले ती व्यक्तिलाई खुँडा फालेर आत्मसमर्पण गर्न भने पनि नमानेपछि प्रहरीले चलाएको गोली लागेर ती व्यक्तिको पनि मृत्यु भएको छ ।
घटनामा ती व्यक्तिका ज्वाइँ पनि सख्त घाइते भएका र एक वर्षीय बच्चा भने सुरक्षित रहेको स्थानीय अखबारले जनाएको छ । प्रहरीले उक्त घटनामा संलग्न व्यक्ति वा परिवारका बारेमा केही बताएको छैन ।
अमेरिकाबाट प्रकाशन हुने खसोखास अनलाइनका अनुसार, हत्यामा संलग्न व्यक्ति ५० वर्षीय छत्रबहादुर थापा हुन् । मारिनेमा छत्रबहादुरकी पत्नी ५१ वर्षीया बिन्दा थापा र छोरी ३१ वर्षीया ममता थापा रहेका छन् । ज्वाइँ ३५ वर्षीय सन्तोष कुमार बस्नेतको अवस्था गम्भीर रहेको र उनको उपचार भइरहेको छ ।
प्रहरीका अनुसार स्थानीय समय अनुसार, सोमबार बिहान करिब ५ बजे पर्सिमोन सर्कलस्थित एक घरमा ती पुरुषले आफ्नी छोरी, श्रीमती र ज्वाइँमाथि खुँडा प्रहार गरेका थिए। घटनास्थलमा पुगेका प्रहरी टोलीले ती पुरुषलाई ज्वाइँमाथि पुन: आक्रमण गरिरहेको अवस्थामा भेटेका थिए।
प्रहरीले खुँडा फाल्न बारम्बार चेतावनी दिए पनि उनले नमानेपछि प्रहरीले गोली चलाएको थियो । त्यसपछि प्रहरीले सीपीआरमार्फत बचाउने प्रयास गरे पनि उनको घटनास्थलमै मृत्यु भएको थियो।
घटनामा ती पुरुषकी छोरीको घटनास्थलमै मृत्यु भएको थियो भने गम्भीर घाइते भएकी श्रीमतीलाई अस्पताल लगिएकोमा बिहान ९ बज्नुअघि नै मृत घोषणा गरिएको प्रहरीले जनाएको छ। ज्वाइँको अवस्था गम्भीर रहेको र उपचार भइरहेको बताइएको छ।
घटनाका बेला घरमै रहेका एक वर्षका बालक भने सकुशल फेला परेका छन्। प्रहरीले घटनामा प्रयोग गरिएको चक्कु बरामद गरेको छ।
प्रहरी प्रमुख केभिन डेविसले आफ्नै परिवारमाथि गरिएको यस्तो आक्रमण अकल्पनीय र अत्यन्त दर्दनाक भएको बताएका छन्।
घटनाबारे थप अनुसन्धान भइरहेको प्रहरीले जनाएको छ।
पछिल्ला केही समयदेखि अमेरिकामा नेपाली समुदाय भित्र हत्या, हिंसा र आत्महत्याका घटना बढ्न थालेका छन् ।
समाचार स्रोतः FFXNOW.COM
